भांगरभूंय | प्रतिनिधी
भांगरभूंय । प्रतिनिधी
म्हापशेंः म्हापशें पालिका मंडळान हालींच केल्ल्या मार्केट पे पार्किंग दरवाडीक मार्केट वेपारी संघटनेन विरोध करून ती फाटीं घेवपाची मागणी करपी निवेदन मंगळाराक पालिका मंडळाक सादर केलां.
संघटनेचो अध्यक्ष श्रीपाद सावंत आनी सचीव सिद्धेश राऊत हाणे हें निवदेन सादर केलें. मार्केटांत पे पार्किंग सुरू करपाक संघटनेन पालिका मंडळाक सहकार्य केल्लें. पार्किंगात शीस्त येवची व्हो ताच्या फाटलो हेत आशिल्लो. मात पे पार्किंग शुल्क वाडयल्यान मार्केटांत येवपी गिरायकांचो आंकडो उणो जावंन आमच्या वेवसायाचेर परिणाम जावपाची भिरांत ह्या निवेदनांत उक्तायल्या.
बाजारांत येवपी लोक, वेपारी, दुकानदारांक तांची वाहना पार्क करपाक सुवात मेळची, कश्या कशीं वाहनां पार्क करचीं न्हय हे खातीर पे पार्किगा खातीर आमी सहकार्य केल्लें. मात तातूंत वाड केल्ल्यान लोक मार्केटांत येवचे नात अशें वेपारी संघटनेचें म्हणणे आसा.
पालिका मंडळाक मार्केटाच्या माध्यमांतल्यान भाडें, सोपो आनी हेर टॅक्साच्या रुपान बऱ्याच कोटी रुपयांची येणावळ मेळटा. हें सगळें मार्केटांत येवपी गिरायकांचेर निंबून आसता. सध्याचे स्थितींत गिरायकांक पालिका मार्केटा भायर वस्तू घेवपाक जायते पर्याय उपलब्द आसात. ताका लागून पे पार्किंग शुल्क वाडोवप आत्मघाती थारतलें. पालिका मंडळान मार्केटांत मुळाव्यो सुविधा तयार करपाचेर लक्ष दिवचें. पे पार्किंग दरवाड फाटीं घेवंन पयलींच्या दरान दुचाकींक 5 आनी चार चाकींक 10 रुपये शुल्क लागू करचें अशें संघटनेन सांगलां.
पालिका मंडळान मार्केट वाठारांत लोकांक दिसतले अशे सुवातेर पार्किक दराचे तकटे लावचे. बेशीस्त पार्किंग जावचें न्हय हे खातीर पार्किंग स्लॉटाचें मार्किंग करचे, शुक्राराक सप्तकी बाजाराच्या दिसा मुखेल दारा कडेन बेशीस्तपणान वाहानां पार्क करतात. शकुंतला पुतळ्यच्या वाठारांत वेपाऱ्यां खातीर पार्किंगाची खासा वेवस्था फुकट करची अशी मागणी वेपारी संघटनेन केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
