भांगरभूंय | प्रतिनिधी
इतिहासाचे मध्यकालीन समयांत राजकी थळाचेर गोंय पुर्तुगेजांच्या कबज्यांत आसलें. कोंकणी भाशा उलोवप, शिकप आनी बरोवप ह्या तिनाचेरुय बंदी आसली. कर्नाटकाक थळांतर जाल्या कोंकणी लोकांक स्वताची आवयभास कोंकणी केवळ मौखिक जावन उरली. विसाव्या शतमानांत सगळ्या प्रमुख भाशांचें साहित्य वाडपाच्या आनी मुद्रणांच्या पर्व कालांत बी गोंयांत हो बदल येवपाची संद मेळ्ळी ना. असल्या क्लिश्ट काळांत शणै गोंयबाबाचो उदय जालो आनी तांणी कोंकणी लोकांची आत्मजागृती केली. ते खातीरुच आयज एक कोंकणी राज्य आसा, कोंकणी राजभास जाली, साहित्य अकादेमीचो पुरस्कार लाभता, कोंकणीक संविधानांत स्थान प्राप्त जालां, ज्ञानपीठ आनी सरस्वती सम्मान कोंकणीक फावो जाला. गोंय सावन भायरच्या कोंकणी लोकांक ‘माधव मंजुनाथ शानभाग कोंकणी सेवा पुरस्कार’चो सम्मान फावता. 1920 – 2020 ह्या शंभर वर्सां भितर कोंकणीची व्हडली उदरगत जाल्या. तिची बुन्याद शणै गोंयबाबान घाल्ली. आयज कर्नाटकांत बी कोंकणी शिक्षण चालतींत आसून आयज मेरेन 4200 विद्यार्थी देवनागरी लिपयेंत कोंकणी भाशेंत साक्षर जाल्यात”, अशें विचार मंगळूरांत घडोवन हाडिल्ल्या शणै गोंयबाब पुण्यतिथी निमतान घडोवन हाडिल्ल्या कोंकणी दीस कार्यावळींत व्यक्त जाले.
विश्व कोंकणी केन्द्राचे विश्वस्थ प्रो. डाॅ. कस्तुरी मोहन पै आनी अ. भा. कोंकणी परिशदेचे आदले अध्यक्ष के. गोकुलदास प्रभु हांणी सचित्र म्हायती दिवून शणै गोंयबाबाक आर्गां ओंपलीं. नामनेची टिव्ही निवेदक सुचित्रा शेणाॅय उपाख्यानाची प्रमुख संचालक आसली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
