‘2023 फूल फोर्म्स’ पुस्तकाचें लोकार्पण

भांगरभूंय | प्रतिनिधी

तरणाट्यांनी साहित्याच्या मळार आपलें योगदान दिवचें: मंत्री काब्राल

पणजी: लेखक एडवीन फेर्नांडीस हांच्या ‘2023 फूल फोर्म्स’ इंग्लीश पुस्तकाचें प्रकाशन भौशीक बांदकाम मंत्री निलेश काब्राल हांचे हस्तुकीं जालें.

बागा-शेळवणा, कुडचडें गांवांत मायली पब्लिकेशनाचे वतीन हो प्रकाशन सुवाळो आयोजीत केल्लो.

ह्या वेळार भौशीक बांदकाम मंत्री निलेश काब्राल, लेखक एडवीन फेर्नांडीस, साहित्यीक आनी लेखक विन्सी क्वाद्रुस, साहित्यीक विशाल खांडेपारकार, इमेक्युलेट सी. विद्यालायाची मुख्याध्यापिका ग्रीटा कार्दोजा, आदले सरपंच मनोज नायक, शिक्षिका जेनिफा डायस, मायली पब्लिकेशनाचे धनी बाजिलीया त्रावासो, समाज सेवक मिलाग्रीस फेर्नांडीस, वेवसायीक फ्लावियानो फेर्नांडीस मानेस्त हाजीर आशिल्ले.

पास्काचे परबे निमतान लेखक एडवीन फेर्नांडीस सारक्या तरणाट्याचें पुस्तक उजवाडाक येता. ही खोशयेची गजाल. फाटलीं साबार वर्सा सावन हो तरणाटो कोंकणी साहित्याची सेवा करता. आयज एडवीनान इंग्लीश पुस्तक उजवाडायलां. देखून खेरीतपणान परबीं फावता. भास खंयचीय आसूं ताणें ही सुरू केल्लीं साहित्याची सेवा आपले तरेन अशींच चालू दवरचीं. एडवीन सारक्या लेखकांचो आदर्श दोळ्यां सामकार दवरून तरणाट्यांनी साहित्याच्या मळार आपलें योगदान दिवचें. आपूण तांकतां तश्यो पुस्तकांच्यो प्रती विकत घेवन गांवच्या लेखकांक उर्बा आनी प्रोत्साहन दितलों म्हणपाचें भौशीक बांदकाम मंत्री निलेश काब्राल हांणी आपल्या उलोवपांत सांगलें.

एडवीनान फुडारांत सृजनशील साहित्याचेर लक्ष केंद्रीत करचें. तो एक बरो कवी जावन आसा. देखून ताणें आपल्या लेखणेंतल्यान सृजनशील साहित्यांत मोलांची भर घालून राष्ट्रीय मळार पावचें असो उलो साहित्यीक आनी लेखक विन्सी क्वाद्रुस मारलो.

आयज पास्कांची परब संवसारभर मनयतात. ह्या परबे दिसा एडवीना सारको तरणाटो इंग्लीश साहित्याच्या मळार पावल घालतना खोस भोगता. फाटल्या साबार वर्सा सावन हो तरणाटो कोंकणी मळार नेमान लेखन करता. ताका पर्जळींत फुडार आंवडेतां अशें साहित्यीक विशाल खांडेपारकर हांणी सांगलें.

पुराय कार्यावळीचें सुत्रसंचालन शिक्षिका जेनिफा डायस हिणें केलें. बाजिलीया त्रावासो हिणें मानेस्तांक येवकार दिलो. ह्या वेळार समाज सेवक फ्लावियानो फेर्नांडीस हांणी आपल्या भावाक परबीं भेटोवन साहित्याच्या मळार येस आंवडेलें.