भांगरभूंय | प्रतिनिधी
प्रतिक्षा गुरव: काणकोणा ज्येश्ठ नागरिकांक डिजिटल सेफ्टीचें मार्गदर्शन
काणकोण: आयज सायबर गुन्यांव वाडत आशिल्ल्यान ऑनलायन वेव्हार करतना सगल्यांनी जतनाय घेवची. अनवळखी मनशाच्या संदेशांक, ई-मेलांक आदींक जाप दितना हजार फावटीं विचार करचो. दुबाव आशिल्ल्या लिंकाचेर क्लिक केल्यार अर्थीक फटको बसपाक शकता. तशेंच फेसबुकाचेर केल्ली इश्टागत म्हारग पडपाक शकता. मोबायल सांडल्यार रोखडीच पुलीस स्टेशनांत कागाळ करून बँकेंत जावपी वेव्हार बंद करपाची म्हायती बँकेक दिवची, अशी म्हायती हॅल्प एज इंडियाची पदाधिकारी प्रतिक्षा गुरव हांणी दिली.
काणकोण सिनियर सिटीझन फोरमच्या वांगड्यांक हॅल्प एज इंडियाच्या पदाधिकार्यांनी डिजिटल सेफ्टीचें मार्गदर्शन केलें. हें शिबीर काणकोण सिनियर सिटीझनाच्या कार्यालयांत जालें. ह्या वेळार प्रतिक्षा हांणी प्ले स्टोर अॅप, बँकींग ऑन लायन, बील पेड, स्ट्रोंग पासवर्ड, फेक मेसेजीस, एस.एम.एस., व्हाट्सअॅप मेसेजीस, ट्रू कॉलर हे संबंदी म्हायती दिली.
हॅल्प एज इंडिया जनते खातीर फुकट भलायकी तपासणी शिबिरां घेत आसता. तशेंच फुकट वखदां दीत आसता, अशी म्हायती तांणी दिली.
सुरवातेक संस्थेचे अध्यक्ष गिल्हेर्म मार्टिन्स हांणी येवकार दिलो. आर. एस. नायक हांणी वळख करून दिली. निमाणें रत्नाकर काणकोणकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
