भांगरभूंय | प्रतिनिधी
आयुर्वेदीक वैद्य डॉ. सरदेशमूख हांच्या शिबिराक बरो प्रतिसाद
पणजी: आयुर्वेद पद्दतींत कॅन्सरा सारक्या रोगांक बरे करपाची तांक आसा. पूण ही पद्दत दामून उडोवपाचे यत्न जाल्यात आनी ते आजूनय चालू आसात. पांच हजार वर्सांची परंपरा आशिल्ली ह्या वखदांची पद्दत तिगोवन दवरपाक आमचे सरकार यत्न करता, अशें केंद्रीय मंत्री श्रीपाद नायक हांणी सांगलें.
पर्वरीचे नामनेचे आयुर्वेदीक डॉक्टर सुकुमार सदानंद सरदेशमूख हांच्या मार्गदर्शनाखाला आयोजीत केल्ल्या आयुर्वेदीक वैजकी शिबिरांत मुखेल सोयरे म्हणून मंत्री नायक उलयताले. ह्या वेळार भाजपाचे गोंय प्रदेश अध्यक्ष सदानंद शेट तानावडे, साळगांवचे आमदार केदार नायक, भाजपाचे उत्तर गोंय जिल्हो अध्यक्ष महानंद अस्नोडकार, रेईश मागूशची सरपंच सुष्मिता सुभाष पेडणेंकार, डॉ. गोविंद काळे आनी हेर मानेस्त हाजीर आशिल्ले.
उद्देजक आनी समाजसेवक शितल चोडणकार हांच्या फुडारपणा खाला आनी बिडीएसटीच्या आयुर्वेद म्हाविद्यालय, वाघोली, पुणे, इंडिग्रेटेड कॅन्सर ट्रिटमेंट आनी रिसर्च सेंटर आनी आयुर्वेद अॅड पंचकर्मा हॉस्पिटल, वाघोली, पुणे हांच्या जोड पालवान हे शिबीर आयोजीत केल्लें. डॉ. सुकुमार सदानंद देशमूख हांच्या फुडारपणा खाला हें शिबीर जालें. ह्या शिबिराक बरो प्रतिसाद मेळ्ळो.
एक बरो उपक्रम राबयल्ले खातीर सदानंद शेट तानावडे हांणी आयोजकांक बरबीं भेटयलीं आनी फुडें सांगलें, श्रीपादभाऊ केंद्रांत आयुष मंत्री असताना आयुर्वेदाक पुराय संवसारभर मान्यताय मेळ्ळी. आयुर्वेदाक न्याय दिवपाचे यत्न ते आयुष मंत्री आसतना जाले. धारगळे उबारिल्ल्या आयुर्वेदीक हॉस्पिटला फाटल्यान तांचें व्हड योगदान आशिल्ल्याचें तांणी सांगलें.
पुर्वजांचें गिन्यान आनी भारतीय पुर्विल्लें शास्त्र हें गोंयचें पवित्र भुंयेर लोकसेवे खातीर वापरपाची संद मेळटा म्हणून खोशी आसां. अर्थीक नदरेन दुबळे आशिल्ल्या कॅन्सर दुयेंतींक आमची संस्था फुकट उपचार दिता. ताका लागून आमकां विवीध संघटणां कडल्यान आनी सरकारा कडल्यान अर्थीक आदार मेळटा. श्रीपादभाऊ आयुष मंत्री आसतना आमचे संस्थेक ‘सेंटर ऑफ एक्सेलन्स’ हो दर्जो फावो जालो अशें डॉ. सुकुमार सरदेशमूख हांणी सांगलें.
डॉ. गोविंद काळे हांणी केल्ल्या मंत्र घोशांत दिवली पेटोवन शिबिराचें उक्तावण जालें. शितल चोडणकार हांणी सगळ्यांक येवकार दिलो आनी प्रास्तावीक आनी उपकार मानले. ह्या वेळार उपचारा खातीर आयिल्ल्यांची वेवस्था बरे तरेन केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
