भांगरभूंय | प्रतिनिधी
गोविंद तारी: शेळप खुर्द शाळा समुहाच्या बाल आनंद मेळाव्यांत मार्गदर्शन
वाळपय: भुरग्यांक विवीध उपक्रमां वरवीं शिक्षणांत सतत उमेद निर्माण करपाची गरज आसा. हांतल्यान भुरगीं बरे तरेन शिक्षण घेवपाक शकतात. अशे तरेच्या उपक्रमां वरवीं भुरग्यां मदीं चैतन्य निर्माण करा अशें सरकारी माध्यमीक विद्यालय भुयपालचे कलाशिक्षक गोविंद प्रभाकार तारी हांणी सांगलें.
सरकारी माध्यमीक विद्यालय शेळप खुर्द हांगा आयोजीत केल्ल्या शाळा समुहा वतीन बाल आनंद मेळाव्याच्या उक्तावण सुवाळ्या वेळार गोविंद तारी हे उलयताले.
ह्या वेळार माचयेर विद्यालयाची मुख्याध्यापिका रंजीता प्रभू, शरिरीक शिक्षक प्रजय गांवस, शिक्षिका प्रकृती तारी आनी शिक्षक यशवंत गांवकार हाजीर आशिल्ले.
ह्या वेळार परंपरीक रितीन दिवली पेटोवन ह्या मेळाव्याचें उक्तावण जालें.
गोविंदा तारी हांणी फुडें, सरकारा वरवीं चलपी सगळ्या शाळांनी व्हडा प्रमाणांत बाल मेळाव्यांचें आयोजन करतात. ताका लागून भुरग्यांक बरी संद निर्माण जाल्या. दरेका भुरग्या मदीं एक वेगळे तरेचें चैतन्य भरलां. ह्या चैतन्याक सकार्याचें फाटबळ मेळ्ळ्यार भुरगीं फुडाराक बरे तरेन उदरगत करपाक पावतलीं. हे खातीर तांचे भितर आशिल्ली कला सोदून काडपाचो यत्न करपाक जाय. ताका लागून बाल मेळाव्या सारकिल्ले उपक्रम सामके गरजेचे अशें तांणी सांगलें. हो मेळावो आयोजीत करपाक सरकारी माध्यमीक विद्यालय, शेळप खुर्द आनी हेर संबंदी शाळेच्या शिक्षकांनी पालक शिक्षक संघान आनी नागरिकांनी बरे तरेन सहकार्य केल्ले खातीर सगळ्यांक परबीं भेटयलीं आनी उपकार मानले.
ह्या वेळार प्रास्तावीक मुख्याध्यापिका रंजीता प्रभू हांणी करतना म्हणलें, पालक शिक्षक संघ आनी नागरिकांनी बरे तरेन सहकार्य केल्ले खातीर अश्या बाल आनंद मेळाव्याचें आयोजन करप शक्य जालें. ह्या मेळाव्यांत संबंदीत मुळाव्या शाळेंतल्या 67 भुरग्यांनी वांटो घेतलो. तांकां विवीध तरेचें शिक्षण दितले.
ह्या वेळार हाजीर आशिल्ल्या संबंदीत शाळेच्या शिक्षकांनी विचार मांडले.
ह्या मेळाव्यांत शिक्षकांनी विवीध विशयांचेर बरे तरेन मार्गदर्शन केलें. हातूंत भासांचें व्याकरण, सय, वाचन कुशळटाय अश्यो विवीध गजाली शिकयल्यो. ह्या वेळार शरिरीक शिक्षक प्रजय गांवस हांणी कराटेचीं प्रात्यक्षिकां करून दाखयलीं. तशेंच विवीध कतरेचे खेळ बाल आनंद मेळाव्या वरवीं भुरग्यांक शिकयले.
कार्यावळीचें प्रास्तावीक आनी सुत्रसंचालन शिक्षिका प्रकृती तारी आनी निमाणें शिक्षक यशवंत गांवकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
