भांगरभूंय | प्रतिनिधी
विजयकुमार नायक: पिळगांवां ‘चंद्र कालोत्सव’ रंगलो
दिवचल: संस्कृतायेची राखण कलेंतल्यान जाता. कलाकारांनी कलेक पयलें प्राधान्य दिवचें आनी आपले गिरेस्त कलेचें दायज मुखार व्हरचें असो उलो वरिश्ठ नाटककार विजयकुमार नायक हांणी मारलो.
मा. दिनानाथ मंगेशकार, पंडीत. जितेंद्र अभिषेकी, मा. दत्ताराम सारक्या दिग्गज कलाकारांनी गोंयचें कलांगण समृद्ध केलें. तांचे उपरांत तांचे तोडीचो कलाकार आयज आमच्या गोंयांत दिसना, असो हुस्को तांणी उक्तायलो. सम्राट क्लबा सारक्यो संस्था कलाकारांक माची उपलब्ध करून दिल्ले खातीर सम्राट क्लबाक विजयकुमार नायक हांणी परबीं भेटयलीं.
चैत्र पौर्णिमेक हनुमान जल्मोत्सवा दिसा वरगांव पिळगांवच्या श्री चामुंडेश्वरीच्या आंगणांत तळ्याचे देगेर ‘चंद्र कलोत्सव’ कार्यावळ रंगत गेली. ह्या वेळार नाटक कलाकार नायक उलयताले. सम्राट क्लब दिवचल वतीन आयोजीत हे कार्यावळींत गोंयच्या कलाकारांनी आपल्या कलाविष्कारांनी खर्या अर्थान हो उत्सव समृद्ध केला. ह्या वेळार नाट्य, कविता सादरीकरण, चित्रकला सादरीकरण, मिमिक्री, पेटी एकोडें वादन, नाच, बासरी वादन, जादूचे प्रयोग दाखोवन कलाकारांनी हाजीर आशिल्ल्यांक आपले कलेंत मग्न केले.
ज्येश्ठ नाटककार विजयकुमार नायक आनी उद्देजक संदीप निगळ्ये हांचे हाजेरींत सुरवातेक तळयेंत पणती सोडून कार्यावळ सुरू जाली. संदीप निगळ्ये हांणी आपलें मनोगत ह्या वेळार उक्तावन परबीं भेटयलीं. सम्राट क्लब दिवचलचे अध्यक्ष निलेश टोपले, कार्यावळ संयोजक प्रसाद नायक, शेखर नायक, डॉ. प्रवीण सावंत आनी हेर ह्या वेळार हाजीर आशिल्ले.
सिद्धराज शेट्ये हांणी सुरवातेक गणेश वंदना सादर केली. निलेश टोपले हांणी सगळ्यांक येवकार दिलो. यदुनाथ शिरोडकार हांणी सुत्रसंचालन केलें. प्रसाद नायक हांणी निमाणें उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
