भांगरभूंय | प्रतिनिधी
इंडियन प्रिमीयर लिगेंत (आयपीएल) आयज जाल्ले पयले मॅचींत राजस्थान रॉयल्सान दिल्ली कॅपिटल्साक 57 धांवड्यांनी हारयलो.
राजस्थान रॉयल्साच्या बॅट्समनांनी आक्रमक बॅटींग करतना 199 धांवड्यांचो दोंगर उबारलो. जाल्यार दुसरे वटेन दिल्ली कॅपिटल्साचे बॅट्समन परतून एकदा अपेशी थारले. मुखेली डॅव्हिड वॉर्नरान मॅचीची सगली जापसालदारकी स्वताचे भुजाचेर घेतली. पूण, ताचो यत्न फुकट गेलो. ट्रॅण्ट बोल्टान पयले ओव्हरींत दोन धपके दीत दिल्ली कॅपिटल्साक बॅकफुटाचेर धुकल्लो आनी ते उपरांत दिल्लीक स्वताक सांबाळपाकूच जालें ना. वॉर्नरान आयपीएलांत 61वे खेपे 50 परस चड धांवड्यो केल्यो. पूण, दिल्लीक जैत मेळोवन दिवपाक ताचो यत्न फावोसो थारूंक ना. दिल्लीक अंदूंच सेगीत तिसरे हारीक तोंड दिवचें पडलें.
पृथ्वी शॉक दिल्ली कॅपिटल्सान इम्पॅक्ट खेळगडो म्हणून मैदानांत देंवयलो. पूण, तो परतून एकदा इम्पॅक्ट सोडपाक अपेशी थारलो. ट्रॅण्ट बोल्टान पयले ओव्हरींत पृथ्वी आनी मनीष पांडे हांकां बाद केले. रायली रुसो आनी डॅव्हिड वॉर्नर हांणी 36 धांवड्यांची भागिदारी करून दिल्लीचो डाव सांबाळपाचो यत्न केलो. पूण, आर आश्विनान रुसोक 14 धांवड्यांचेर बाद करून दिल्लीक 36 धांवड्यांचेर तिसरो धपको दिलो.
वॉर्नराचे बॅटींगेंतलें सातत्य हे मॅचींत लेगीत दिसलें. ताणें आयपीएलांत स हजारांचो टप्पो लेगीत हुपलो. आयपीएलांत असो पराक्रम करपी तो वट्ट तिसरो आनी पयलो विदेशी खेळगडो थारलो.
वॉर्नर आनी ललित यादव हे जोडी दिल्लीक मोखीच्या लागसार व्हरपाक शकता अशें दिसतालें. दोगांयनी 44 बॉलांनी 64 धांवड्यांची भागिदारी केली. पूण, रॉयल चॅलेंजर्स बंगळुरून बोल्टाक परतून बॉलिंगेक हाडलो. ताणें आपल्या मुखेल्याचो निर्णय योग्य थारायतना ललिताक (38) बोल्ड करून दिल्लीची वायट अवस्था केली.
दिल्लीक निमाण्या तीन ओव्हरींनी 14.50चे सरासरीन धांवड्यो करपाची गरज आशिल्ली. वॉर्नर आनी उप मुखेली अक्षर पटेल मैदानांत आशिल्ले. अक्षर (2) कालचेय मॅचींत अपेशी थारलो. ताका युजवेंद्र चहलान बाद केलो. रोव्हमन पॉवेल (2) लेगीत आश्विनाचे बॉलिंगेचेर बाद जालो. एके वटेन विकेटी पडत आशिल्ल्यान हे खेपे लेगीत वॉर्नराची खेळी फुकट वतली हें स्पश्ट जालें. अखेरेक चहलान वॉर्नराक बाद केलो. दिल्लीक 9 विकेटी वगडावन 142 धांवड्यो करप शक्य जाल्यो.
ते पयलीं राजस्थान रॉयल्सान 4 विकेटी वगडावन 199 धांवड्यो केल्यो. यशस्वी जैसवालान (60) आनी जॉस बटलरान पयले विकेटी खातीर आक्रमक सुरवात करून दिली. दोगांयनी 8.3 ओव्हरींनी 98 धांवड्यांची भागिदारी केली. बटलरान 51 बॉलांनी 11 चवके आनी एका सक्याचे मजतीन 79 धांवड्यो केल्यो. हेटमायरान 21 बॉलांनी 39 धांवड्यांची नाबाद खेळी केली. ताणें एक चवको आनी चार सके मारले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
