भांगरभूंय | प्रतिनिधी
थिवी उद्देगीक वसणुकेंतली घडणूक, जीकेबी कंपनीची टांकी
भांगरभूंय । प्रतिनिधी
म्हापशें: थिवी करासवाड्या वयले उद्देगीक वसणुकेंतले जीकेबी कंपनीची रसायनीक पिठो दवरिल्ली टांकी फुटली. हो रसायनीक पिठो कंपनींतल्यान मुखेल रस्त्याचेर व्हांवून आयलो. ह्या पिठ्याचो कोणाकूच त्रास जावचो न्हय हे खातीर तो रस्तो उदकान धुवन नितळ केलो.
ही घडणूक शेनवारा सकाळीं 11.30 वरांच्या सुमाराक घडली. कंपनींत रसायनीक पिठो दवरिल्ले टांकयेचो स्फोट जालो आनी टांकयेंतलो पिठो व्हड प्रमाणांत भायर उसळ्ळो. हो रसायनीक पिठो वक्लां करचे खातीर वापरतात.
ह्या पिठ्याक लागून कंपनीचो वाठार तशेंच मुखेल रस्तो धवोफुल्ल जाल्लो. रस्त्याचेर आयिल्ल्या पिठ्याक लागून गाडयो निसरून अपघात जावचो न्हय, हे खातीर कंपनी वतीन उदकाचे टँकर मागयले आनी रस्तो धुंवपाचें काम हातांत घेतलें. वरभरान पिठ्यान भरिल्लो रस्तो धुवन नितळ केलो.
मजगतीं, ही दुर्घटणा कित्याक लागून जाली, हे विशीं कसलीच म्हायती कंपनी वतीन दिवंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
