लखनौचें घरच्या मैदानाचेर दुसरें जैत

भांगरभूंय | प्रतिनिधी

लखनौ सुपर जायण्ट्सान आपल्या घरच्या मैदानाचेर इंडियन प्रिमीयर लिगेच्या (आयपीएल) 16व्या हंगामांतलें दुसरें जैत जोडलें. लोकेश राहुलाच्या फुडारपणाखाला खेळपी लखनौन सनरायझर्स हैदराबादाक 5 विकेटींनी हारयलो.

ह्या जैता उपरांत लखनौ पंगड गुणतकट्यांत दुसरे सुवातेर पावलो. तीन मॅची उपरांत ताचे चार गूण जाल्यात. हैदराबादान दिल्ली 122 धांवड्यांची मोख 16 ओव्हरींनी पांच विकेटी राखून मेळयली. कृणाल पांड्यान अश्टतासांचें प्रदर्शन केलें. पयलीं ताणें 18 धांवड्यो दिवन तीन विकेटी घेतल्यो आनी उपरांत 31 बॉलांनी 35 धांवड्यांची खेळी केली. ताचे खेरीत राहुलान 35 धांवड्यांचें योगदान दिलें.

ते आदीं सनरायझर्स हैदराबादान टॉस जिखून पयलीं बॅटींग करपाचो निर्णय घेतलो. ते उपरांत बॅटींगेक मैदानांत देविल्ल्या हैदराबादाच्या बॅट्समनांक लखनौ सुपर जायण्ट्साच्या बॉलरांनी घाम काडलो.

मयंक अग्रवाल आनी अनमोलप्रीत सिंग हांणी डावाची सुरवात केली. पूण, तिसरेच ओव्हरींत कृणाल पांड्याच्या बॉलिंगेचेर मयंग अग्रवाल (8) सवाय भितर तंबूंत परतलो. पांड्यान सेगीत दोन बॉलाचेर दोन धपके दिले. आठवे ओव्हरीच्या चवथ्या बॉलाचेर अनमोलप्रीत (31) हाका एलबीडब्ल्यूड बाद केलो. जाल्यार फुडल्या बॉलाचेर मुखेली अॅडम मार्करमाक शुन्याचेर बोल्ड करून हैदराबादाक मोठो धपको दिलो.

हॅरी ब्रुका कडल्यान हैदराबादाक संयमी खेळ करून धांवड्यो वाडोवपाची आस्त आशिल्ली. पूण, ताका ताकतीक जाली. रवी बिश्नोईच्या बॉलाचेर मुखार येवन शॉर्ट मारपाच्या यत्नांत ब्रूक पयल्याच बॉलाचेर स्टम्प बाद जालो.

लखनौन 40 वर्सां पिरायेच्या अमित मिश्राक आपले वटेच्यान पदार्पणाची संद दिली. कृणाल आनी रवी हांच्या वळपी बॉलां उपरांत अमित मिश्रा सारको अणभवी बॉलरान सनराझर्साक नाकापुरो केलें. रवी बिश्नोईन चार ओव्हरींनी 16 धांवड्यो दिवन 1 विकेट घेतली. कृणाल पांड्यान ताचे परस उत्कृश्ट बॉलींग घाली. ताणें चार ओव्हरींनी 18 धांवड्यो दितना तीन विकेटी घेतल्यो.

राहुल त्रिपाठीन सादूरतायेन खेळ केलो. पूण, 18वे ओव्हरींत यश ठाकूराच्या बॉलाचेर अपर कट मारपाच्या यत्नांत त्रिपाठी 35 धांवड्यांचेर कॅच बाद जालो. मिश्रान डाय मारून कॅच धरली. त्रिपाठीन 41 बॉलांनी चार चवक्यांचे मजतीन 35 धांवड्यो केल्यो. वॉशिंग्टन सुंदरान 27 बॉलांनी 16 धांवड्यो करून बाद जालो. अमित मिश्रान ताका बाद केलो. आदील राशिदाक कॅच बाद करून अमितान चार ओव्हरींनी 23 धांवड्यो दिवन दोन विकेटी घेतल्यो.

20वे ओव्हरींत हैदराबादा वतीन पयल्या सक्याची नोंद जाली. अब्दुल समदान ते ओव्हरींत दोन सके मारून हैदराबादाची धांवसंख्या 8 बाद 121 मेरेन पावयली. समदान 10 बॉलांनी नाबाद 21 धांवड्यो केल्यो.