भांगरभूंय | प्रतिनिधी
राज्यपाल: सांखळे डायलिसीस आनी कॅन्सर दुयेंतींक भेटयली अर्थीक मजत
दिवचल: वसुधैव कुटूंबकम ही भारताची संकल्पना आशिल्ल्यान प्रधानमंत्री नरेंद्र मोदी देशाक विश्वगुरु दिकेन व्हरपा खातीर खुबशे तरेन योगदान दिता. गोंयांत खूब बरें काम सुरू आशिल्ल्यान मुख्यमंत्री डॉ. प्रमोद सावंत हांणी पुरायेन योगदान दिलां. लोक प्रतिनिधी आनी समाजीक संघटना एकठांय आयल्यार समाजसेवेच्या कार्यावळींतल्यान व्हड निधी खर्च करतना जायत्या जाणांक मजतीचो हात दिवप शक्य आसा. राज्यांत कॅन्सर आनी डायलिसीसचो आंकडो वाडिल्ल्यान तांकां मजत दिवपा खातीर राजभवनान राबयल्ल्या उपक्रमाक सगळ्यांनी साथ दिली. ह्या समाजीक कामाक देशांतल्या हेर राजभवनांतल्यानूय सुरवात जातली, असो विस्वास राज्यपाल पी. एस. श्रीधरन पिल्लई हांणी उक्तायलो.
साखळेच्या रविंद्र भवनांत आयोजीत कार्यावळींत गोंयचे राज्यपाल पी. एस. श्रीधरन पिल्लई आनी मुख्यमंत्री डॉ. प्रमोद सावंत हांणी राजभवन उपक्रमांतल्यान 48 डायलिसीस आनी कॅन्सर दुयेंतींक अर्थीक मजत भेटयली. तशेंच राज्य दिव्यांग आयोगा वतीन गरजू व्यक्तींक मियोइलेक्ट्रीक हात भेटयले.
ह्या वेळार माचयेर मुख्यमंत्री डॉ. प्रमोद सावंत, समाजकल्याण मंत्री सुभाष फळदेसाय, गोपाळ सुर्लकार, गुरुप्रसाद पावसकार आनी हेर हाजीर आशिल्ले.
दिव्यांगां खातीर खाशेलें कायमस्वरूपी मजत केंद्र आनी तांच्या कृत्रीम रोंपणाची विवीध तरेची दुरुस्ती करपा खातीर खाशेलें केंद्र सुरू करून राज्यांतल्या 12 टक्के अपंगांक सरकार मजत करतलें. तशेंच आतां कॅन्सर दुयेंतींक सरकार पांच लाखां मेरेन उपचार दितलें अशें मुख्यमंत्री डॉ.प्रमोद सावंत हांणी जाहीर केलें.
गोंयांत कॅन्सर उपचारा खातीर आनीक दर्जेदार सुविधायो निर्माण जावच्यो देखून डायलिसीस खातीर सरकारान फुकट सुविधाय दिल्या. दरेकल्यान सामाजीक बांधिलकी राखून मजत केल्यार ते दुयेंती समाधानी जातले अशें राज्यपालान सांगून, राज्यांत 12टक्के दिव्यांग आसात. तांकां मुखेल प्रवाहांत हाडून नवी जीण जगपाचें काम सरकारान केलां. तांकां समाजीक सेवे खाला संस्था, कंपनीन सहकार्य दिवप ही बरी गजाल आशिल्ल्याचें तांणी म्हणलें. ह्या वेळार मुख्यमंत्री डॉ. प्रमोद सावंत हांच्या कामाची राज्यपालान तोखणाय केली.
मुख्यमंत्री डॉ. प्रमोद सावंत हांणी, अंतोदय, सर्वोदय, ग्रामोदय तत्वाचेर आमचें काम सुरू आसा. दिव्यांगांक पवन पुत्र हनूमाना प्रमाण दिव्य शक्ती मेळची आनी तांकां नवी जीण जगपाक मेळची म्हणून विशेश अवयव दिवन तांचो आत्मविश्वास वाडयला. सरकार सदांच तांचे खातीर कार्यरत रावतलें अशें तांणी सांगलें.
मंत्री सुभाष फळदेसाय हांणी दिव्यांगांक आधुनीक तरेचीं उपकरणां उपलब्ध करून दिवपा खातीर सरकारान खुबश्यो येवजण्यो राबयल्यात. समाजकल्याण खात्या वतीन जायते उपक्रम घेतना समाजीक संस्थांच्या सहकार्यान दरेक दिव्यांग आत्मनिर्भरते खातीर तशेंच ताका सगळे तरेची मजत दिवपाक मुख्यमंत्री आनी आमचें सरकार व्हड काम केल्ल्याचें तांणी सांगलें.
ह्या वेळार राव हांणी येवकार दिलो. सिध्दी पोरोब हांणी सुत्रसंचालन आनी गुरुप्रसाद पावसकार हांणी उपकार मानले.
ह्या वेळार दिव्यांगांक आधुनीक अवयव रोपण तशेंच कॅन्सर आनी डायलिसीस दुयेतींक अर्थीक मजत दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
