भांगरभूंय | प्रतिनिधी
निलेश काब्रालः चांदेल उदका प्रकल्पाक भेट, उदका पुरवण विभागाच्या अधिकाऱ्यांक धरले धारेर
भांगरभूंय । प्रतिनिधी
पेडणें: विस्तारीक चांदेल उदका प्रकल्प मे म्हयन्यांत पुराय जातलो. टांकये खातीर सुवात मेळ्ळी जाल्यार आपूण एका वर्सा भितर उदकाची समस्या सोडयता, ना जाल्यार आपूण मंत्रीपदाचो राजिनामो दिता, अशी घोशणा भौशीक बांदकाम मंत्री निलेश काब्राल हांणी केली.
पेडणें म्हालांत सध्या उदकाची समस्या गंभीर जाल्या. दोनूय म्हालांत आमदारांक लोकांच्या रागण्याक फुडो करचो पडटा. ताका लागून 5 एप्रीलाक भौशीक बांदकाम मंत्री निलेश काब्राल हांणी चांदेल उदका प्रकल्पाक भेट दिली. ह्या वेळार मंत्री काब्राल हांणी ही घोशणा केली. ह्या वेळार पेडणें मतदारसंघाचे प्रवीण आर्लेकार, मांद्रें मतदारसंघाचे आमदार जीत आरोलकार, पेडणें भाजपा मंडळ अध्यक्ष तशेंच चांदेलचे सरपंच तुळशीदास गांवस, वारखंडची सरपंच गौरी जोसलकार, कासारवर्णेचे सरपंच नवनाथ नायक, तोरशेंची सरपंच प्रार्थना मोटे, मोपाचे सरपंच सुबोध महाले तशेंच उदका पुरवण विभागाचे अधिकारी हाजीर आशिल्ले.
ह्या वेळार मंत्री काब्राल हांणी उदका पुरवण विभागाच्या अधिकाऱ्यांक बरेच धारेर धरले. नेमके कारस्थान खंय शिजता, हाचेर आमदारांचे हाजिरेंत गरमागरम चर्चाय जाली.
पेडणें म्हालांत सध्या उदकाची समस्या गंभीर जाल्या. ही समस्या सोडोवचे खातीर फाटल्या सरकारान चांदेल उदका प्रकल्पाचो विस्तार करचे खातीर विस्तारीत प्रकल्प उबारतना जी गरजेची जमीन आसा ती जमीन संपादीत करूंक नाशिल्ली. ताका लागून उदका खातीर टांकयो बांदपाक जमीन नाशिल्ल्यान भौशीक बांदकाम खात्याक अडचणी येतात. दोनूय लोकप्रतिनिधी आनी थळाव्या पंचायतीन फुडाकार घेवन जांच्यो जमनी ह्या प्रकल्पा खातीर आनी टांकयो बांदपा खातीर वतल्यो तांचे कडेन चर्चा करची. जमनीच्या धनयांक योग्य मोबदलो दितले, अशी म्हायती ह्या वेळार मंत्री काब्राल हांणी दिली. जर जमीन मेळ्ळी जाल्यार एका वर्सा भितर उदकाचो प्रस्न सुटावो जावन चार वरां नियमीत उदका पुरवण करतले. नाजाल्यार मंत्रीपदाचो राजिनामो दितलो, अशेंय तांणी सांगलें. ह्या वेळार आपल्या पंचायत वाठारांत कशे तरेन उदकाचो उणाव आनी समस्या कशी उप्रासता हाची म्हायती विवीध सरपंचांनी दिली. उदकाची समस्या सोडोवचे खातीर गांव पांवड्या वयल्यान वट्ट 24 टांकयो उबारतले. तातूंतल्यो 14 टांकयो बांदून पुराय जाल्यो. उरिल्ल्यो टांकयो बांदपाची प्रक्रिया सुरू जाल्ल्याची म्हायती मंत्री काब्राल हांणी दिली. हाचेर कांय सरपंचांनी प्रस्न करून ज्यो आदीं टांकयो बांदल्यात, त्या टांकयां मेरेन चांदेल उदका प्रकल्पाचें उदक वचना जाल्यार फुडारांत उदका पुरवण कशी जातली, अशें मंत्र्यांक विचारलें. तेन्ना मंत्री काब्राल हांणी अधिकाऱ्यां कडेन चर्चा करून म्हत्वाच्यो सुचोवण्यो केल्यो.
उदकाचो पुराय हिशेब दियातः निलेश काब्राल
15 एमएलडी उदक प्रकल्पांतल्यान नेमकें खंय वता, हाचो पुराय हिशेब आनी म्हायती दिवची, अशें मंत्री निलेश काब्राल हांणी सांगलें. अधिकाऱ्यांनी ह्या वेळार वेगवेगळ्यो जापो दिल्यो. कोणे सांगलें, 12 एमएलडी उदक, कोणे सांगलें 13 आनी कोणेतरी सांगलें 15 एमएलडी उदक दर दिसा सोडटात. हाचेर मंत्री काब्राल हांणी सगळ्यांक धारेर धरून उदक नेमकें खंय वता ताचो हिशेब दिवचो. तशेंच ताचेर उपाय येवजण करपाचीय तांणी सुचोवणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
