भांगरभूंय | प्रतिनिधी
विवीध मळावेल्या मानेस्तांचो आनी विद्यार्थ्यांचो केलो भोवमान
पणजी: बार्देस अस्मिताय केंद्रान हालींच आपलो 25वो वर्धापन दीस उमेदीन मनयलो. ह्या वेळार वर्सुकी इनामां भेटवण सुवाळो आनी भोवमान कार्यावळ जाली. हो सुवाळो सारस्वत विद्यालय आनंद गिरी केणी सभाघर म्हापशें हांगा जालो. ह्या सुवाळ्याक ज्ञानपीठ फावो जाल्ले ज्येश्ट साहित्यीक दामोदर मावजो मुखेल सोयरे ह्या नात्यान हाजीर आशिल्ले. तशेंच कोंकणी भाशा मंडळाची अध्यक्ष अन्वेषा सिंगबाळ हाजीर आशिल्ली.
ह्या वेळार साहित्य अकादमी पुरस्कार मानेली माया खरंगटे, शिक्षिका कुसूम अग्रवाल, शिक्षिका अनघा कामत, बँकर नूतन साखरदांडे, समाजसेवक अॅड. इशान उसपकार आनी डॉ. सचीन गोवेकार हांचो भोवमान जालो. तशेंच धावी आनी बारावेचे परिक्षेंत कोंकणी विशयांत सगळ्यांत चड गूण मेळयल्ल्या बार्देस म्हालांतल्या विद्यार्थ्यांचो ह्या वेळार भोवमान जालो. केंद्रा वतीन घेतिल्ल्या चित्रकला सर्त, नाच सर्त आनी शुद्धलेखन सर्तीच्या भुरग्यांक ह्या वेळार इनामां भेटयलीं.
हे कार्यावळीचें उक्तावण परंपरीक रितीन दिवली पेटोवन जालें. तशेंच माचयेर हाजीर आशिल्ल्या मानेस्तांक झाडांचे रोपे भेटोवन येवकार दिलो. ह्या वेळार भोवमान केल्ल्या मानेस्तांची वळख चंद्रिका पाडगांवकार, काश्मीरी पावसकार, सुचेता पै, निलिमा पिळर्णकार, प्रणिता थळी, हरिष कामत आनी वामन धारवाडकार हांणी करून दिली.
हे कार्यावळीक येवकाराचें उलोवप अध्यक्ष अपर्णा गारुडी हांणी केलें. कार्यावळीचें सुत्रसंचालन गोविंद मोपकार आनी विमन कारेंकार हांणी केलें. उपकार सचीव सोनाली चोडणकार हांणी मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
