भांगरभूंय | प्रतिनिधी
भांगरभूंय । प्रतिनिधी
फोंडेंः फोडें पालिका मंडळाची वेंचणूक लागी पावली तरी लडोवपाक इत्सूक आशिल्ल्या उमेदवारां मदीं नाराजी दिसून येता. मतदार वळेरेंत जायत्यो त्रुटी आशिल्ल्यान मतदार लेगीत गोंदळांत पडल्यात. मतदार वळेरेंतल्या ह्या घोटाळ्याक लागून खंयच्या प्रभागांतल्यान वेंचणूक लडोवपाचें हें उमेदवारांनी अजून थारायल्लें ना.
पालिकेच्या प्रभाग 15तल्यान वेंचणूक लडोवपाक जायते जाण इत्सूक आसात. कांय आदल्या नगरसेवकांचो तातूंत आसपाव आसा. मात मतदारवळेरेंत बऱ्याच मतदाराचीं नांवा दुसऱ्याच प्रभागांतले वळेरेंत आसात. ताका लागून कांय इत्सूक उमेदवार निर्शेल्यात. शैलेंद्र शिंक्रे, किशोर नायक, मनोज केणी, व्हिन्सेट फर्नांडीस हे आदले नगरसेवकांनी वेंचणूक लडोवपाची तयारी केल्या मात प्रभाग फेररचणुकेंत घोळ जाल्ल्यान तांणी न्यायालयांत दाद मागपाची तयारी सुरू केल्या अशी खबर आसा.
भाजपान कांय प्रभागां खातीर आपले उमेदवार निश्चीत केल्यात. तातूंत भाजपा फोडें मंडळाचो अध्यक्ष विश्वनाथ दळवी हाचो आसपाव आसा. अंदू आपल्या प्रभागांत जैताची हॅट्रीक करपाचो तांचो विचार आसा. शांताराम कोलवेकार खंयच्या प्रभागांतल्यान वेंचणूक लडयता ताचे कडेन सगल्यांची नदर आसा. तांचो प्रभाग हे फावट बायलां खातीर राखीव जाल्ल्यान तांका दुसरो प्रभाग सोदून काडचो पडटलो.. 5 नंबराच्या प्रभागांत खडेगांठ लडत जावपाची अपेक्षा आसा. नगराध्यक्ष रितेश नायक हे फावट प्रभाग 5तल्यान वेंचणूक लडोवपाची शक्यताय आसा. थंयच्या थळाव्या तरणाट्यांनी श्रावण नायक हाका वेंचणूक लडोवपाक सध्या फुडें काडलां. ताका लागून वेंचणूक रंगतली अशें दिसपाक लागलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
