भांगरभूंय | प्रतिनिधी
भांगरभूंय । प्रतिनिधी
फोंडेंः धारबांदोडें तालुक्यांतल्या तांबडी सुर्ला हांगच्या पुरातन म्हादेव देवळाच्या वाठारांत आशिल्ल्या गाड्यांचो प्रश्न परत एक फावट उप्रासला. देवळाच्या वाठारांत कोयर जावपाक लागल्ल्यान पंचायत मंडळान गाडेकारांक नोटीसो धाडून दंडाची कारवाय करपाची शिटकावणी दिल्या. कोयर जरी कोयराच्या कुंड्यात दवोरतात तरी रातया खेतीं तो भायर उडयतात असो गाडेकारांचें म्हणणें आसा.
कांय थळावे लोक ह्या गाड्यां वरवीं पोट भरतात. देवूळ पळोवपाक येवपी पर्यटकांक लागून तांकां गिरायक मेळटा. सुटयेच्या दिसांनी पर्यटक व्हडां प्रमाणांत येतात. सुमार 16 गाड्यांक पंचायत मंडळान परवाने दिल्यात. मात तातूंतल्याा 7-8 जाणांनी वेवसाय सुरू केला. मात देवळाच्या वाठारांत उडयतात त्या कोयराक लागून तांच्या सामकार प्रश्न उबो जाला.
देवळाची देखभाल भारतीय पुरातत्व सर्वेक्षण खात्या वतीन करतात. कांय दिसां आदी पंचायत मंडळान गाडे देवळा पसून 300 मीटर अंतराचेर व्हरचें अशें गाडेवाल्याक सांगल्लें. मात कांयच करूंक नाशिल्ल्यान खात्यान परत पत्र धाडलां. कोयर घालपाक खासा कुंड्यो केल्यात. पंचायत दर वर्सा गाडेवाल्यां कडल्यान 120 रुपये कोयर कर घेता. कोयर उखलून व्हरपाक खासा वाहनाची वेवस्था केल्या. मात हें वाहन वेळार येना. ह्या वाठारांत व्हडा प्रमाणांत खेतीं आसात. रातयां ती कोयर फाफसून उडयतात.
देवळाच्या वाठारांत थळावे लोक गाडो वेवसाय करतात. मात कोयराक लागून समस्या उप्रासल्या. लोकांचे पोट भरपाचें साधन बंद करपाचो आमचो हेत ना. मात वाठार नितळ दवोरून पर्यटनाक चालना दिवपाचो आमचो यत्न आसा अशें साकोड्डेची सरपंच प्रिया खांडेपारकारान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
