भांगरभूंय | प्रतिनिधी
भांगरभूंय । प्रतिनिधी
पोरणे गोंयः गोंय विधानसभेच्या अर्थसंकल्पी अधिवेशनांत पास केल्ले कृशी विधेयकाक तशेंच कोमुनिदाद कायदो आनी हायवे दुरुस्ती विधेयकाक मान्यताय दिवची न्हय हे खातीर राज्यपाल पी एस श्रीधरन पिल्लय हांका निवेदन सादर करपाचें रिव्होल्युशनरी गोवन्स पक्षान (आरजी) थारायलां.
कृशी विधेयकांचेर सारकी चर्चा करनास्तना ती विधासभेंत घाई गडबड करून पास केल्यांत. ती गोंयकार विरोधी विधेयकां आसात आनी तांचेर पुराय अभ्यास केल्या उपरांत राज्यपालाक तांकां मान्यताय दिवची न्हय हे खातीर विनवणी करपाचें आमी थारायलां अशें आरजीचो मुखेली मनोज परबान पत्रकारांक सांगलें. शेत जमीन हस्तांतरणाक बंदी घालपी विधानसभेन पास केल्लें विधेयक गोंयच्या शेत जमनीची राखण करपी विधेयक आसा अशें जरी वयल्या साराक दिसता तरी तातूत फळ झाडां, काजू बागायती, कुळागरां, कुरण जमीन हाची राखण करपाची कसलीच तजवीज ना असो दावो परबान केलो.
कोमुनिदात विधेयकांक जमनीच्या दोन प्लॉटांत मदलो रस्तो 5 वयल्यान 10 मीटर करपाची तजवीज आसा. कोमुनिदादीच्या जमनींत व्हडले निवासी प्रकल्प उबारपाक मेकळीक दिवपा खातीर केल्ली ही तजवीज आसा. कोमुनिदादीचें अधिकार काडून घेवपा खातीर सरकारान हें विधेयक हाडलां असो आरोप परबान केलो. हायवे दुरुस्ती वरवीं सरकार जमीन धनयाचें मान्यताये बगर जमीन घेवपाक सोदता आनी डोक्युमेन्टेशन नाशिल्ली घरां मोडपाक सोदता अशें ताणे सांगलें.
गोंयचे जमनीची राखण करपा खातीर जमीन राखण विधेयक आपूण विधानसभेंत मांडटलों अशी म्हायती आमदार विरेश बोरकारान दिली. विधानसभेचें फुडलें अधिवेशना चड दिसांचे घेवपाक जाय अशें ताणे सांगलें.
—————————————————————————
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
