भांगरभूंय | प्रतिनिधी
भांगरभूंय । प्रतिनिधी
पेडणेः धारगळ पंचायत वाठारांत जावपाक घातिल्ल्या जयदेव मोदी हाच्या डेल्टा कंपनीच्या इलेक्ट्रॉनीक कॅसिनोत थळाव्या पेडणेकारांक 90 टक्के नोकऱ्यो दिल्यात ही उद्देग मंत्री माविन गुदिन्हो हांणी गोंय विधानसभेच्या अर्थसंकल्पी अधिवेशनांत दिल्ली म्हायती सामकी फट आसा असो पेडणेकारांचो दावो आसा. धारगळ हांगचो हो कॅसिनो अजून सुरूच जाल्लो ना, तेन्ना नोकऱ्यो कोणाक दिल्यात हें जाहीर गुदिन्हो हांणी जाहीर करचें अशें आव्हान तांणी ताका दिलां.
गोंय गुंतवणूक प्रोत्साहन मंडळान मंजूर केल्ल्या सात उद्देग प्रस्तावांत डेल्टा कंपनीच्या धारगळ हांगच्या पांचनखेत्री कॅसिनोचो आसपाव आसा. धारगळ हांगा 4 लाख 27 हजार चौखण मीटर सुवातेंत हो कॅसिनो उबारतात. ह्या प्रकल्पा वरवीं 4 हजार जाणांक नोकऱ्यो मेळटल्यो अशें कंपनीन सरकाराक सादर केल्ल्या प्रस्तावांत सांगलां. ह्या प्रकल्पांत पांच हॉटेल्स कन्व्हेशन सेंटर, मल्टिप्लेक्स सिनेमा, रिटेल एरिया बँक सुविधा, चिल्ड्रन एंटरमेंट एरिया हाचो आसपाव आसा. प्रकल्पा खातीर दिल्ली चडशी जमीन शेत जमीन आनी बाकीची तिळारी पाटबंधारे वाठारांतली आसा हें आतां सामकार आयलां.
आपल्या सांस्कृतीक कलेंचे दायजाचें संवर्धन करपी पेडणे तालुक्यांत सरकार जुगारी वेवसाय हाडपाक मेकळीक दिता हे खातीर पेडणेकार नाराजी उक्तायतना दिसतात. तातूंत कॅसिनो प्रकल्पांत 90 टक्के पेडणेकार काम करतले अशी फटीची म्हायती विधानसभेंत दिल्ल्यान ते तिडकल्यात. धारगळच्या कॅसिनोक विरोध करपा खातीर पेडणे तालुक्यांतल्या जाग्रुत लोकांची एक बसका 2021 वर्सा सप्टेंबरांत पेडणे हांगा जाल्ली आनी त्या वेळार पेडणे तालुको कॅसिनो हटाव मंचाची स्थापणूक केल्ली.
उद्देग मंत्री माविन गुदिन्हो हांणी धारगळच्या कॅसिनोंत पेडणेकारांक 90 टक्के नोकऱ्यो दिल्ल्याची म्हायती दिवंन पेडणेकारांक परत खुबळून घातल्यात. विधानसभेंत फटीची म्हायती दिवन समा न्हय. मोपा विमानतळा विशींय अशीच चुकीटी आंकडेवारी दिल्ली. आयुष्य हॉस्टिटलांत थळाव्यांचो विचार लेगीत करनास्तना सध्या उमेदवारांच्या मुलाखती घेवपाचें काम चल्लां अशें मोपाचो सरपंच सुबोध महाले हांणे सांगलें. मुख्यमंत्री आनी गुदिन्हो हांणी थळाव्या लोकांक विस्वासांत घेवंन तांचे कडेन चर्चा करची आनी वस्तुस्थिती समजून घेवची अशें महाले हाणे मागलां.
डेल्टा गँबलींग आसू वा हेर प्रकल्प पेडणेकारांच्या तोंडार फकत नोकऱ्यांची टक्केवारी मारली म्हणटगीर जालें अशें सरकाराक घडये दिसता. मोपा विमानतळार शंबर टक्के आनी आयुष्य हॉस्पिटलांत 85 टक्के नोकऱ्यो पेडणेकारांक राखून दवोरल्यात अशें सरकार सांगता, त्यो केन्ना मेळटल्यो हाची पेडणेकार वाट पळयत आसात अशें निवृत्त सरकारी अधिकारी गोपाळ शेट्ये हाणे सांगलें. आतां माविन गुदिन्हो 90 टक्क्यांची गजाल सांगता. पेडणेकार आंदोलन करपाचे भानगडींत पडचे नात हाची सरकाराक खात्री आशिल्ल्यान पेडणेकारांक नोकऱ्यो दिल्यो आनी तांणी त्यो घेतल्यो अशें सरकार सांगपाक लागलां अशें ताणे फुडें सांगलें. ज्ञानेश्वर वरक आनी भारत बांगकार हाणीय खर प्रतिक्रिया उक्यायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
