भांगरभूंय | प्रतिनिधी
गोंयचो राज्य खेळ म्हूण फुटबॉलाक मान्यताय मेळ्ळ्या, पूण शिकताना जर हो खेळ बरे तरेन म्हळ्यार अनुभवी मार्गदर्शका कडल्यान खेळूंक मेळ्ळो जाल्यार विद्यार्थ्यांक खूब सोंपें जातलें. म्हूण तर सेसा कंपनीन समाजिक येवजणी चालीक लायतना सांखळे फुटबॉल अकादमी सुरु केली, खेरीज खाजगी आयटीआय लेगीत सुरु केली. सुटये भितर जायतीं शिबिरां जातात, ताची म्हायती आमकां दिसाळ्यांनी वाचूंक मेळटा. ‘खेलो इंडिया’ येवजणी भितर बॅडमिंटन स्विमिंग आनी टेबल टेनिस शिकपाक मडगांवां, म्हापश्यां निवड जाली. आतां पणजे कांपालार 3 एप्रिलाक क्रीडा संकुल सुवातीचेर निवड जावपाची आसा. जांकां ह्या खेळा भीतर फुडें सरचें अशें दिसता, तांणी हांचो लाव जरूर घेवचो . ह्या शिबिरांत तुमकां अणभवी मार्गदर्शक उपलब्ध जातलेच, त्या खेरीज त्या खेळाची साधनाय मेळटलीं. हाचे खातीर इरफान खान- बॅडमिंटन (9886417597) सुजित- स्विमिंग (9743300093), उपेंद्र सिंग- टेबल टेनिस (7085909914) हांच्या लागीं संपर्क करूं येता. निवडीक वतले तेन्ना जल्म तारखेचो पुरावो, त्या- त्या खेळान केली प्रगतीचे कामगिरीचो पुरावो आनी तुमचो पासपोर्ट साईजीचो फोटो व्हरपाक विसरू नाकात.
आतां आयटीआय केंद्रां जशीं सरकारी आसात, तशीं खाजगी लेगीत आसात, पूण खाजगी वाठारांत साखळी सेसा कंपनीन जें केंद्र सुरु केलां तशीच तांणी फुटबॉल अकादमी लेगीत सुरु केल्या. तंत्रज्ञान शाळा तुमकां कुशळटायेचें शिकप दिता तर फुटबॉल खेळांत खेळगडी जावपाची संद दिता. खंयचा खेळा भितर तुमी जर नांव जोडटले तर तुमकां मार्गदर्शन जाय. सेसा फुटबॉल अकादमीन तज्ञ अनुभवी खेळगड्याचें मार्गदर्शन मेळपाची सुविधा आसा. फुटबॉल खेळ हो लोकप्रिय तर आसाच, खेरीज तो आमच्या राज्याचो खेळ म्हूण जाहीर जाल्लो आसा. आमच्या ह्या खेळा भितर आमी जायते राष्ट्रीयच न्हय तर आंतरराष्ट्रीय पांवड्या वेले खेळगडी तयार केल्यात. ताळगांवचो आंतरराष्ट्रीय गोल किपर ब्रह्मानंद शंखवाळकार हाका पदमश्री पुरस्काराचो बहुमान केंद्र सरकारान दिला. सांगचें म्हळ्यार सेसा कंपनी भौशीक मळार भरपूर काम करता ताचोच एक भाग म्हळ्यार साखळे सुरु केल्ली तंत्रज्ञान शाळा. हे शाळेंत तुमकां धावी उपरांत इलेक्ट्रिशियन, इन्स्ट्रुमेंट, मेकँनिक, फिटर आनी फक्त चलयां खातीर अंदुंच्यान जावपी कोपा हो संगणकाचो कोर्स. हे कोर्स गांवगिऱ्या वाठारांतल्या विद्यार्थ्यांक नोकरी ना जाल्यार आपलो वेवसाय सुरु करपाक खूब फायदेशीर जातले.
ह्या वाठाराची नेमकी गरज वळखून सेसाच्या वेवस्थापनान हें पावल फुडें घालां. मुख्याध्यापक गजेंद्र हळर्णकार, सीईओ नवीन जाजू, पीआरओ प्रसाद आजगांवकार आनी हेर पदाधिकारी हे खातीर खूब वावुरतात. फुटबॉल अकादमी वरवीं तुमकां अनुभवी मार्गदर्शक मेळटा आनी हाच्या खातीर आसपासच्या नेमांत बसपी विद्यार्थी हांकां वेंचून काडटात. तुमकां सर्तींनी वांटेकार जावपाक मेळटा. आता मेरेन हे अकादमीन 168 खेळगडी तयार केल्यात, जे वेगवेगळ्या पांवड्याचेर खेळटात. ह्या भितर डेंझिल फ्रॅन्को, मिकी फर्नांडिस, परेश शिरोडकार, आदिल खान हांचो आसपाव आसा. आता तांणी चलयां खातीर लेगीत लीग सुरु केल्या. करिष्मा वळवयकार हें ताचें उदाहरण म्हणू येता. बरेच फावट तुमका संद मेळ्ळी तरी मार्गदर्शन मेळटलेंच अशें ना. फुटबॉल अकादमीन तुमका योग्य मार्गदर्शन मेळपाची वेवस्था केल्या.
शिकप कितें हो प्रश्न बरेच वेळार विद्यार्थ्याक पडटा. आताचें शिक्षण घेतना ताका नोकरी मेळपाची संद आसा वो ना हाचोय विचार जाय. तुमचे लागीं कुशळटाय आसत तर हें काम सोंपें जावं शकता. तेन्ना तुमी आयटीआय केंद्रांचो विचार करतना आपल्याक कुशळताय खंयची मेळूं शकता हांचोय विचार करून पावलां उखलपाचीं. सद्या शिबिराची गडबड सुरु जातली, तातूंत आवड आशिल्ल्या शिबिराक तुमी चड प्राधान्य दिवचें.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
