भांगरभूंय | प्रतिनिधी
रोहन खंवटेः विवीध तरांच्या पर्यटनांक चालना
भांगरभूंय । प्रतिनिधी
पणजीः गोंयांत येवपी पर्यटकांक सुरक्षा दिवपांत गोंय एक पावल मुखार आसा. थळावे ‘अतिथी देवो भवः’ हे संस्कृतीचो प्रत्यय युरिको डायस हाच्या धाडसांतल्यान आमकां आयला. ताका लागून पर्यटक गोंयांत गोंयकारां सयत सुरक्षीत आसात, अशें पर्यटन मंत्री रोहन खंवटे हांणी सांगलें.
शेनवारा भाजपा कार्यालयांत आयोजीत पत्रकार परिशदेंत पत्रकारांच्या प्रस्नांक मंत्री खंवटे जापो दिताले. ह्या वेळार तांणी सांगलें, केंद्र आनी राज्य सरकाराच्या जोडपालवान गोंयांतल्या पर्यटन मळार विवीध बदल जातात. अदीक बऱ्यो मुळाव्यो सुविधा आनी फक्त दर्यादेगां पुरतेच मर्यादीत रावनासतना विवीध तरांच्या पर्यटनांक चालना दितात.
केंद्र सरकारा कडल्यान स्वदेश दर्शन 2.0च्या माध्यमांतल्यान 200 कोटींचो निधी गोंयाक आयला. ते भायर विवीध तरांच्या कामां खातीर निधींची तजवीज केल्या. ङौशीक खाजगी भागिदारीच्या माध्यमांतल्यान कांय प्रकल्प उबे रावतले. तातूंत होम स्टे, अध्यात्मीक पर्यटन, एडव्हेंचर पर्यटन, वेलनेस पर्यटन, मनरिजवण पार्क अशा पर्यटनांचो आस्पाव आसा. वर्सुकी परवामो येवजणेचोय खूब फायदो जातलो. सध्या गोंय जशें आसा ताचे परस अदीक उंचायेर व्हरपाचें आसा, अशें मंत्री खंवटे हांणी सांगलें.
गोंयांत जसजशो पर्यटनाच्यो संदी वाडटल्यो तसतशी रोजगारांत वाड जातली. तरणाट्यां खातीर नव्यो संदी उपलब्ध जातल्यो, अशीय म्हायती मंत्री खंवटे हांणी दिली. मजगतीं, अर्थसंकल्पांत पर्यटन विभागा खातीर भरीव तजवीज केल्या. अंदूंचो अर्थसंकल्प हो स्वयंपूर्ण आनी आत्मनिर्भर गोंय करपा खातीर परिपूर्ण अर्थसंकल्प आसा अशेंय मंत्री खंवटे हांणी ह्या वेळार सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
