भांगरभूंय | प्रतिनिधी
भांगरभूंय । प्रतिनिधी
केंपेंः व्ही फॉर केंपें हें संस्थे वतीन गोंयचे आदले रणजी खेळगडे अवधूत आमोणकार आनी अबरार खान हांचो समाज कल्याण मंत्री सुभाष फळदेसाय हाचे हस्तुकी भोवमान केलो. केंप्यांतल्या ह्या खेळगड्यांनी रणजी सर्तींत गोंयचें प्रतिनिधीत्व केल्लें. ताची दखल घेवन नव्या खेळगड्यांक उर्बां मेळचीं म्हणून ही भोवमान कार्यावळ आयोजीत केल्ली.
कार्यावळीक गोंय क्रिकेट असोसिएशनाचो सचीव रोहन गांवस देसाय, उप सचीव रुपेश नायक, व्ही फॉर केपेंचो अध्यक्ष योगेश कुंकळ्येकार, कार्याध्यक्ष संदीप फळदेसाय, पत्रकार सुशांत कुंकळ्येकार, ख्रिस्तानंद पेडणेकार, श्यामकांत नायक, मकरंद फळदेसाय, जबार मुल्ला, महेंद्र गोसावी, अविनाश फातर्पेकार, मनोज राणे, गिरीश बेणे, रेमेडियो रिबेलो, नारायण सुखटणकार हाजीर आशिल्लो.
हांव जरी सांगें मतदारसंघाचो आमदार आसलो तरी केपें ही म्हजी कर्मभूंय. व्ही फॉर केपें संस्थे कडेन म्हजे लागीचे संबंद आसात. राज्यांत सध्या बऱ्यो खेळा सुविधा आसात. तरणाट्यांनी ताचो लाब घेवचो अशें सुभाष फळदेसायान ह्या वेळार सांगलें. गोंय क्रिकेट असोसिएशनान राज्यांत क्रिकेटीचे उदरगती खातीर सुरू केल्ल्या वावराक सुभाष फळदेसायान सरकारा वतीन मजत करची अशें रोहन गांवस देसायान मागलें. व्ही फॉर केंपें संस्था सामाजीक, सांस्कृतीक आनी खेळा मळार वावुरता अशें योगेस कुकळ्येकारान सांगलें. भोवमानाक जाप दितना अवधूत आमोणकारान तरणाट्यांक सद्या उपलब्द आशिल्ल्या साधन सुविधाचो लाब घेवन बरे खेळगडे जावपाचो यत्न करचो असें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
