भांगरभूंय | प्रतिनिधी
खबरां संस्था
जामनगरः भारतीय क्रिकेट पंगडाचो आदलो अश्टतासी खेळगडो सलीम दुराणी (88) आयतारा संवसाराक अंतरलो. फाटलो कांय तेप तो कॅन्सरा कडेन झूज दितालो. गुजरातांतल्या जामनगरांत ताणे निममे स्वास घेतलो. प्रधानमंत्री नरेंद्र मोदी हांणी दुराणीच्या मरणाक लागून दुख्ख उक्तायलां. अर्जुन पुरस्कारान भोवमानीत जावपी दुराणी व्हो पयलो क्रिकेटीयर आशिल्लो. ताका व्हो भोवमान 1960 वर्सा मेळल्लो. भारता खातीर तो 29 टॅस्ट मॅची खेळल्लो. तातूंत एक शेंकडो आनी 7 अर्द शेंकडे आसात. ताणे 75 विकेटी घेतल्ल्यो.
सलीम दुराणी हाचो जल्म 11 डिसेंबर 1934 दिसा अफगाणिस्तानांची राजधानी काबुलांत जाल्लो. ताणे पुराय नांव सलीम अझीझ दुराणी आशिल्लें. जल्मा उपरांत ताचें कुटूंब भारतांत आयिल्लें. ताचो बापूय अब्दुल अझीझ ऑस्ट्रेलिये आड अविभाजीत भारता खातीर दोन अनधिकृत टॅस्ट मॅची खेळल्लो. फाळणे उपरांत तो क्रिकेट प्रशिक्षक महणून कराचीत गेल्लो. सलीम दुराणी आवय वांगडा जामनगरांत आवय वांगडा रावून उपरांत राजस्थानांत गेल्लो.
1961-62 वर्सा सलीम दुराणीन भारताक इंग्लंडा आडची टॅस्ट माळ जिखून दिवपाक म्हत्वाचें योगदान दिल्लें. ताणे कोलकाता आनी मद्रास (आताचें चेन्नय) टॅस्टींत दरेकी 8 आनी 10 विकेटी घेवंन भारताक जैत मेळोवन दिल्लें. उपरांत 10 वर्सांनी ताणे अशीच कामगिरी करून भारताक वेस्ट इंडिजा आड पोर्ट ऑफ स्पेनांतली टॅस्ट मॅच जिखून दिल्ली. हे मॅचींत ताणे क्लायव्ह लॉयड आनी गॅरी सोबर्साक बाद केल्लें. पयले श्रेणीचे क्रिकेटींत ताणे 14 शेकड्डे केल्लें. स्टेडियमाचेर लोकांनी सिक्सराची मागणी केल्यार तो हमखास सिक्सर मारतालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
