भांगरभूंय | प्रतिनिधी
हालींसराक गुगल ट्रान्सलेट इंटरनेटार आयला. तो अणकारा खातीर वापरतात. पूण दरेके प्रादेशीक भाशेंतलीं कांय वाक्यां, उतरां, वाक्प्रचार, प्रतिमाकात्मक शब्दसमूह ताचेर घाले काय भलतेंच कायचेकाय कितें तरी इंग्लीशींत येता. बेबक्यो केल्यो, कायलोळ्यो केल्यो, कावळ्या आवय, आमाड्यांचो रोस असलीं कितेंय प्रकरणां सोडलीं काय गुगल ट्रान्सलेट यंत्रणा खरशेता. कोल्ला पिडा हें अशेंच उतर. ताचो सुगंध त्या कोंकणी उतरांत आसा तितलो तो खंयचेच अणकारीत भाशेंत वचूं नजो.
कोल्ल म्हळ्यार मूड. तापमान हवामान बदलता तशे मूड घुंवतात आनी जांचें कोल्ल घडीघडी फिरता, त्या मनशाक एके तरेची कोल्लाची बादा जडिल्ल्यान त्या मनशाकूच कोल्ला पिडा म्हणटात. जळामळा, सरभोंवतणी, घरांत, सोयऱ्यांगेर, ऑफिसांत, बॅंकेंत, मार्केटांत, बिझनेस वेव्हारांत, जंय जंय मनीस प्राणी आसा थंय ह्यो कोल्ला पिडा सांपडटात. हांचे मूड लहरी. पिसायपणाचीं, हट्टीपणाचीं, विचित्रपणाचीं कसलीं उचांबळीत ल्हारां हांचे तकलेंत उसळत सांगू नजो.
कोल्ला पिडेचें पयलें लक्षण म्हळ्यार तांच्या तोंडार उजवाड आसना. सुतकी. एकदम कोल्ल फिरलें जाल्यार तितल्या पुरतें तोंडांर हांशे हाडून तीं तुका धबधब्या भशेन खबरी सांगून ज्याम करून उडयतात. गोड गोड उलोवन आपल्या कामा पुरतें तुका वापरतात. धपक्याक विसरतात. हीं नसांवां केन्ना तुजेर तापत, उसळत ताका नेम आसना. कारण आसना. रजांव आसना. तांचे तकलेंत दुबावांचे कल्पने भायले किडे वळवळत आसतात. संशयग्रस्त लोक हे. Paranoia (दुबावां पिडा) हें उतर मानसोपचारशास्त्रांत येता, तें ह्या कोल्ला पिडांक लागू जाता.
कोल्ला पिडांचें आनीक समान लक्षण म्हळ्यार ह्या लचांडांक आपणाक लागून दुसऱ्याक त्रास जातात हें केन्नाच कळना. आपल्या वागण्याक लागून घोवाक वा बायलेक त्रास जाता हें कोल्ला पिडेन ग्रस्त सहचराक कळचना. कोल्ला पिडा हें तशें एबनॉर्मल दुयेंस न्हय. पूण पिसायपणाचेंच प्रकरण. स-नॉर्मल, अन-नॉर्मल, नॉन-नॉर्मल अशें.
कोल्ला पिडा भोंवतणच्यांच्यो तकल्यो खातात. जीव खातात. एकेकदां जगणें असह्य करतात. ह्या नसांवांक तेळपाक आनी अभ्यासपाक कळपाक जाय. हाताळपाक करपाक जाय. तोंड दिवपाक आनी फुडो करपाक कळपाक जाय. कारण तांचें कोल्ल केन्नाय कशेंय घुंवता. देखून कोल्ला पिडेचे झळकेक कोण रावना. कारण जाणून बुजून आपलो जीव फोंडांत घाल्लो कोणाक नाका नासता.
कोल्ला पिडांचे वेगवेगळे नमुने वेगवेगळे तरेचे आसतात. आयज बाजारांत वतना वाटेर तो वा ती कोल्ला पिडा मेळ्ळी जाल्यार आज ती हडकून, आडावन आडावन, भरभरत रावता. ताळतंत्र नाशिल्ली बडबड. पूण फाल्यां तेच वाटेर, त्याच आंब्या झाडा पोंदा ती पिसाय तुका मेळ्ळ्यार तुवें हडकिल्यार लेगीत विचित्र गंभीर नुरा करून पळेनाशिल्ले भशेन कडसरता. असल्या विक्षिप्त वागण्याचेर तूं चिंतीत रावता, आपलें कितेंय चुकलें काय हाचे कडेन वागतना अशी अपराधी भावना तुज्यांत किल्लूंक लागता. आनी हातूंत जिणेचे मोलादीक खीण तूं वगडावन बसता.
कोल्ला पिडांचो एक नमुनो आमच्या ऑफिसांत आशिल्लो. हरशीं वर्सभर एकदम बरो. फक्त एप्रील आनी मे म्हयन्यांत ताचें चाळवतालें. माय तापलो रे, अशें आमी म्हणटाले. त्या दिसांनी तो केंच केंच करूंक लागतकच तिरायताक म्हळ्यार नव्यान ऑफिसांत येवप्याक हो मनीस कॅरॅक आनी जाणवाय अशें दिसप साहजीक. प्रत्यक्षांत तो बरो आशिल्लो. फकत दोन म्हयन्यां उपरांत मीर्ग लागून पावसाच्यो दडको आनी वावझड आयली रे आयली काय हाचें मन, वर्तन नॉर्मलाचेर येवचें.
कोल्ला पिडां कडेन उलोवपाक जिवार येता. पाड पडूं कशें जाता. तीं पिसांटां कशीं रिएक्ट जायत हाका तर्क आनी नेम नासता. कित्याय कितें उलोवप, आवाज बी चडोवप आनी अकस्मात उलयतनाच थांबून आपले तंद्रेंत वचप हीं हांचीं लक्षणां. उलयल्यार नुथू उसळटा ताचे वांगडा नेगेटिविटी पाझरप हें कोल्ला पिडेचें आनीक एक ठळक लक्षण.
सामान्य लोक कोल्ला पिडांच्या मूळ कारणां विशीं विस्कटावणी करून आपापले गांवठी पद्धतीन अर्थ काडीत आसतात. ती लग्न जावंक ना म्हूण अशी कोल्ली, ताका भुरगीं ना म्हूण अशें वागता अशीं मजेशीर रजांवां लोक काडीत आसतात. तीं पुरायेन चुकीचीं आसतात अशेंय म्हणूं नजो. पूण ताका शास्त्रीय बुन्याद आसना हें खरें.
कोल्ला पिडांक संवेदनशीलता काडयेची आसना. अणभव करपाचें इंद्रिय सामकेंच वातड आसता. तांकां पडूनच गेल्लें आसना अशें म्हणप समा थारतलें. हांव, म्हजें हो सुवार्थ मात तांचे भितर वेवस्थीत आसता. पूण दुसऱ्याक आपल्या सुरये सारक्या उतरांनी वायट बी दिसतलें हें तांकां सपनांत लेगीत तकलेंत येना. कोल्ल फिरनाफुडें हे लोक दुसऱ्याचेर तापतात, उसळटात, तटतटतात. दादलो, बायल, चलो, चली, शिकिल्लो, न शिकिल्लो हांचो संबंद कोल्ला पिडा आसपा कडेन कसलोच ना. ही समस्या कोणाकूय जडूं येता.
कंपनी, आस्थापनां आनी कार्यालयांनी नोकरेक जे उमेदवार येतात तांच्यो पदव्यो आनी हेर पात्रता पळेतात. पूण तांच्या सभावांत कोल्ला पिडे दोश आसत जाल्यार तें पारखुपाचें यंत्र जाय. कारण एक कोल्ला पिडा, आख्खें साम्राज्य वाळटी कशी खावन उडयता. पोफडेवन सोडटा.
कोल्ला पिडा जिणेच्या ह्या जंवजाळांत आनी चाचंबरांत तुका म्हाका चुकचनात. त्यो पिडा जीव लायनात, जीव खातात. आमच्यांतली कसली तरी सुप्त शक्ती ह्यो पिडा जागी करतात आनी तें करप हीच तांची जिणेच्या रंगमंचावेली भुमिका आसुंये. कारण तांचे कडेन वेव्हार करतना झुजचेंच पडटा. लोकसंपर्काच्या आमच्या कौशल्याक ह्यो पिडा धार हाडटात. कोल्ला पिडा जिणेंत सुवाद आनी रंग हाडटात त्यो ह्या कारणा खातीर.
मुकेश थळी
फोंडे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
