भांगरभूंय | प्रतिनिधी
उत्तर पूर्व युनायटेड स्टेट्स ऑफ अमेरिकांत णव राज्यांचो आसपाव जाता. ते म्हणल्यार – मेन, न्यू हॅमशा, वमाण्ट, मासच्युसट्स, रोड आयलण्ड, कनॅटीकट, न्यू यॉर्क, न्यू जर्सी आनी पॅन्सिल्वेनिया. मॅरीलॅण्ड, डॅलवॅर, डिस्ट्रिक्ट ऑफ कॉलम्बिया हांचोय आसपाव ह्या वाठारांत करतात. ह्या उत्तर पूर्व युनायटेड स्टेट्साक यू.एस. सॅन्सस ब्युरो अशें म्हणटात. सगळ्यांत चड लोकवस्ती आशिल्लो हो वाठार. ह्या वाठाराची लोकसंख्या 2020 वर्सा 5.7 कोटी आशिल्ली. स्थलांतर करपी चडशे लोक ह्याच वाठारांत राबितो करतात. वेगवेगळ्यो संस्कृतायो आनी वंश आशिल्ले लोक कामा निमतान उत्तर पूर्व युनायटेड स्टेट्सांत स्थायीक जाल्यात. यू.एसाची राजधानी वॉशिंग्टन डीसी ह्याच वाठारांत येता. उद्देग, शेती वेवसाय हाचे सयत, अर्थकारण आनी वाणिज्य हे अर्थवेवस्थेचे दोन म्हत्वाचे घटक थरल्यात.
यूएस राजधानी – वॉशिंग्टन डीसी (डी सी म्हणल्यार डिस्ट्रिक्ट ऑफ कॉलम्बिया) ही युनायटेड स्टेट्स ऑफ अमेरिकेची राजधानी. पटोमॅक न्हंयचे देगेर हो वाठार आसा. संघीय प्रजासत्ताक आशिल्ल्या ह्या देशाचे कार्यकारी, वैधानीक आनी न्यायीक फांटे वॉशिंग्टन डीसींत आसात. म्हणटकच सरकाराचो सगळो कारभार ह्या राजधानी शारांतल्यान चलता. अमेरिकेच्या राष्ट्राध्यक्षाचें अधिकृत कार्यालय ‘व्हायट हावज’ वॉशिंग्टन डीसींत आसा. पुराय इमारत धव्या रंगाची आशिल्ल्यान ताका व्हायट हावज अशें म्हणटात. जॉर्ज वॉशिंग्टन सोडल्यार अमेरिकेचे हेर सगळे राष्ट्राध्यक्ष व्हायट हावजांत रावल्यात.
न्यू यॉर्क – न्यू यॉर्क राज्यांत 20.2 मिलियन परस चड लोकसंख्या आसा. 2021 वर्सा यू यॉर्क राज्य, युनायटेड स्टेट्सांतलें सगळ्यांत चड लोकसंख्या आशिल्लें राज्य थरलें. हडसन न्हंये लागसार न्यू यॉर्क शार आसा. बंदर शार आशिल्ल्यान ह्या वाठाराक म्हत्व आयलें. 19व्या आनी 20व्या शेंकड्यांत वेगवेगळ्या देशांतले लोक ह्या शारांत स्थलांतरीत जाले. यूएसा सयत पुराय संवसाराचें तें अर्थीक केंद्र थरलां. बफलो, रॉचस्टर, याँकर्स हीं ह्या राज्यांतलीं हेर म्हत्वाचीं शारां.
न्यू यॉर्क पर्यटन – पर्यटनाचे नदरेन विकसीत अशें न्यू यॉर्क राज्य. स्टॅच्यू ऑफ लिबर्टी, ब्रुकलीन ब्रीज, सॅण्ट्रल पार्क, मॅट्रोपॉलिटन म्युजियम ऑफ आर्ट, एम्पायर स्टेट बिल्डींग धरून जायतीं वस्तूसंग्रहालयां ह्या राज्यांत पळोवपा सारकीं आसात. 152 फुटाचो स्टॅच्यू ऑफ लिबर्टी पुतळो 1886 वर्सा बांदिल्लो. फ्रांसान अमेरिकेक दिल्ली ही भेट. स्वातंत्र्यदेवतेचो पुतळो म्हणल्यार स्वतंत्रतायेचें प्रतीक अशें ताका मानतात.
न्यू हॅमशा – इंग्लीशमॅन जॉन मेसन हांणी इंग्लंडांतले हॅमशा कावंटीचेर आदारीत ह्या राज्याक नांव दिलें. ह्या राज्याक ‘ग्रॅनायट राज्य’ अशें वळखतात. ह्या राज्यांत ग्रॅनायट मायनिंग मोट्या प्रमाणांत चलता. कॉनकोर्ड हें ह्या राज्याचें राजधानी शार. मॅन्चॅस्टर हें ह्या राज्यांतलें सगळ्यांत व्हडलें शार.
मेन – मेन हें आकारांत खूब मोटें राज्य आसलें तरी ह्या राज्यांत खूब उणी लोकसंख्या आसा. ह्या राज्यांत दर्यादेग वाठार आशिल्ल्यान नुस्तेमारी समाज चड आसात. पूण जायते लोक नोकरी-धंद्या खातीर दुसर्या राज्यांनी स्थायीक जाल्यात. ह्या राज्यांत फ्रँच आनी कनेडियन लोकसंख्या चड आसा. ऑगस्टा हें ह्या राज्याचें राजधानी शार आनी पोर्टलॅण्ड हें सगळ्यांत व्हडलें शार. शिवोड वा लॉबस्टर तशेंच ट्रावट हीं नुस्तीं ह्या वाठारांतल्या दर्यांनी आनी न्हंयांनी मेळटात.
पॅन्सिल्वेनिया – 1787 वर्सा ह्या राज्याक घटक राज्याचो दर्जो मेळ्ळो आनी यूएसाचें तें दुसरें राज्य थरलें. नव्यान घडिल्ल्या संघाक एकठांय दवरूंक मदीं स्थीत आशिल्ल्या पॅन्सिल्वेनिया राज्याची मुखेल भुमिका आशिल्ली म्हणून ह्या राज्याक ‘द कि-स्टोन स्टेट’ अशें म्हणटात. न्यू यॉर्क आनी न्यू जर्सी ह्या राज्यांक तेंकून हें राज्य आसा. पिट्सबर्ग हें शार पॅन्सिल्वेनियाचे दक्षीण पश्चीम वाठारांत आसा. हें शार स्टीलाच्या उत्पादनाचें म्हत्वाचें केंद्र थरलां. ह्या शाराक ‘आयर्न सिटी’ अशें वळखतात.
मासच्युसट्स – मासच्युसट्स हें युनायटेड स्टेट्सांतलें आकारांत ल्हान अशें राज्य. बॉस्टन हें ह्या राज्याचें राजधानी शार. ह्या राज्यांत जायत्यो इतिहासीक सुवाती आसात. तशेंच हें राज्य शिक्षणाचें म्हत्वाचें केंद्र थरलां. हार्वर्ड आनी येल हीं दोन प्रसिद्ध विद्यापिठां ह्या राज्यांत आसात.
स्नेहा सबनीस
9923633789
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
