भांगरभूंय | प्रतिनिधी
फोंडें: बेतोडें पंचायत वाठारांतल्या आशेवाड्यार नळांतल्यान उदकाची पुरवण जायनाशिल्ल्यान थळाव्या लोकांक टँकराचेर निंबून रावचें पडटा. टँकरूय नेमान येनाशिल्ल्यान तांचे उदका खातीर हाल जातात. ह्या वाठारांत नेमान टँकराचें उदक दिवचें, अशी मागणी थळाव्या लोकांनी केल्या.
आशेवाडो वाठार उंचायेर पडटा. ताका लागून थंय नळाचें उदक चडना. ताका लागन भौशीक बांदकाम खात्यान टँकरांतल्यान उदका पुरवण करपाची वेवस्था केल्या. थंय रावपी बिगर गोंयकारांक टँकरा बगर उदकाचो दुसरो पर्याय ना. ताका लागून दरेकल्याच्या घरा मुखार उदका खातीर व्हड व्हड आयदनां, पिंपां दवरिल्लीं दिसतात.
मेळिल्ले म्हायती प्रमाण ह्या वाठारांतल्या घर धनयांनी बिगर गोंयकारांक व्हड प्रमाणांत भाड्याक दवरल्यात. ते बेतोडें उद्देगीक वसणुकेंत काम करतात. ह्या वाठारांत लोकसंख्या चड जाल्ल्यान उदकाचो चड उणाव जाता. बेतोडेंचे सरपंच उमेश गावडे हांणी सांगलें, आशेवाड्यार उद्देगीक वसणुकेंत आशिल्ले टांकयेंतल्यान उदका पुरवण करतात. पूण तो वाठार उंचायेर आशिल्ल्यान थंय ते टांकयेंतलें उदक चडना. हे खातीर बांदकाम खात्या वतीन टँकरांतल्यान उदका पुरवण करतात. टांकयेर बसयिल्लो पंप पोरणो जाला, ताका लागून थंय नवो पंप बसयतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
