भांगरभूंय | प्रतिनिधी
मुख्यमंत्री डॉ. प्रमोद सावंतः हरवळें पंचायत वाठारांत आत्मनिर्भर उपक्रमाक सुरवात
भांगरभूंय । प्रतिनिधी
दिवचलः दरेका गांवाचें सर्वांगी, मुळावी, मानवी उदरगत करपाचें सपन प्रत्यक्षांत हाडचे खातीर तशेंच आत्मनिर्भर आनी स्वयंपूर्ण गांव अस्तित्वांत येवचे हे खातीर गांवांतल्या लोकांनी हेवेदावे विसरून तंटामुक्त गांवाची संकल्पना प्रत्यक्षांत हाडपाक जाय. अशें केल्यारूच उरगतीचीं खुबशीं दारां उक्ती जातली आनी तेच वांगडा स्वावलंबी गांव निर्माण जावप सहज शक्य आसा. ते खातीर मतभेद आनी मनभेद कुशीक दवरून समाजीक जाणीव बाळगून उदरगतीक चालना दिवचे खातीर दरेका पंचायत मंडळान, पालिकांनी, थळाव्या प्रतिनिधींनी सामंजस्य दाखोवचें. ते वरवीं उरदगतीचीं दारां आपसूक उक्तीं जातलीं, अशें मुख्यमंत्री डॉ. प्रमोद सावंत हांणी सांगलें.
हरवळें पंचायत वाठारांत लुपीन फार्मा कंपनी वतीन बायलांक शिंवपाचें मशीन, कोयर निर्मुलना खातीर सीसीटीव्ही केमेरे, तशेंच प्रवासी शेड आनी बायलांनी उत्पादीत केल्ल्या पदार्थ विक्री खातीर मार्केट दालन ह्या स्वयंपूर्ण आत्मनिर्भर उपक्रमांची मुख्यमंत्री डॉ. सावंत हांचे हस्तुकीं सुरवात केली.
ह्या वेळार माचयेर सरपंच राजू मळीक, स्वयंपूर्ण मित्र सतीश वालांतकर. ममता दिवकार, नंदिनी गांवस, अंकुश मळीक, लुपीन फावंडेशनाचे श्रीनिवासराव कलाकुंतला, गुरुदत्ता भट हाजीर आशिल्ले.
पंचायतींत सरकार तशेंच समाजीक सेवा उपक्रमांच्या माध्यमांल्यान खूबश्यो जेवण्यो आंखल्यात. स्वयंपूर्ण मित्र गांवां खातीर वरदान थारतात, मात ताचो लाव कसो घेवचो हे विशीं पंचायत मंडळांनी जागृती करप गरजेचें आसा. साबार उपक्रमांच्या माध्यमांतल्यान आत्मनिर्भर जावपाचे खूबशे पर्याय उक्ते आसात. दरेका हाताक काम हो आपलो संकल्प. ते खातीर भरीव नियोजन केलां. गांवांत एकवट आनी उदरगती खातीर हेवेदावे विसरून आदार केलो जाल्यार खूबशीं कामां सहज जातलीं. हरवळ्या जमीन मेळ्ळी जाल्यार स तीन कोटींचे प्रकल्प उबारून वर्साक एक कोटी उत्पन्न मेळटलें, अशी वेवस्था करपाचो आपलो यत्न आसा. तंटामुक्त गांव जाले जाल्यार स्वयंपूर्ण आनी आत्मनिर्भर गांवांक व्हड चालना मेळटली, अशें मुख्यमंत्री डॉ. सावंत हांणी सांगलें.
ह्या वेळार पंचायत निधींतल्यान सुमार सवा कोटीचो रस्तो आनी हेर कामांक मुख्यमंत्री डॉ. सावंत हांणी सुरवात करून दिली.
नितळ आनी शांत मनाचे मुख्यमंत्री डॉ. सावंत हांकां लागून उदरगतीक चालना मेळ्ळ्या. तांचें दरेके गजाली कडेन बारीक लक्ष आसा. पणजे आसले तरी ते गांवचे उदरगती कडेन नदर दवरून फाटपुरवण करतात, अशें सरपंच राजू मळीक हांणी सांगलें.
श्रीनिवास राव हांणी सांगलें, लुपीन कंपनी गांवांतल्या लोकांक स्वावलंबी करचे खातीर खूबशे उपक्रम हातांत घेतात. कोयर मुक्ती खातीर तशेंच सेंद्रीय शेती खातीर लेगीत समाजीक सेवा उपक्रम चालीक लायता. संजय नायक हांणी सुत्रसंचालन केलें. ममता दिवकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
