भांगरभूंय | प्रतिनिधी
सध्याचो वस्ताद गुजरात टायटन्सान अंदूंच्या इंडियन प्रिमीयर लिगेच्या (आयपीएल) हंगामाक जैतान सुरवात केली. नरेंद्र मोदी आंतरराष्ट्रीय क्रिकेट स्टेडियमाचेर जाल्ले उक्तावणाचे मॅचींत ताणें चार खेपेचो जैतिवंत चेन्नय सुपरकिंग्साक 5 विकेटींनी हारयलो. आयपीएलाच्या इतिहासांत दोनूय पंगडां मदीं फकत तिनूच मॅची जाल्यात आनी तिनूय खेपे गुजरातानूच जैत जोडलां.
चेन्नय सुपरकिंग्सान दिल्ले 179 धांवड्यांचे मोखीचो फाटलाव गुजरात टायटन्सान 19.2 ओव्हरींनी 5 विकेटी वगडान केलो. मोखीचो फाटलाव करपी गुजराताक शुभमन गिल आनी वृद्धिमान साहा हांणी आक्रमक सुरवात करून दिली. दोगांयनी पयले विकेटी खातीर 37 धांवड्यांची भागिदारी केली. साहा 25 धांवड्यो करून राजवर्धन हंगरगेकराचो शिकार थारलो. ते उपरांत गिलान साई सुदर्शना वांगडा मेळून डाव मुखार व्हेलो. पावरप्लेच्या स ओव्हरींनी स्कोर 65 मेरेन पावयलो.
ते पयलीं टॉस हारल्या उपरांत पयलीं बॅटींग करपी चेन्नय सुपरकिंग्सान निर्धारीत 20 ओव्हरींनी 7 विकेटी वगडावन 178 धांवड्यो केल्यो. पुण्याच्या ऋतुराज गायकवाडान अंदूंचे आयपीएलाचे पयलेच मॅचींत धांवड्यांचो पावस घालो.
ताणें अर्द शेंकड्याची खेळी करून अंदूंचे आयपीएलांत पयलो अर्द शेंकडो नोंदोवपाचो मान मेळयलो. तो शेंकडो लेगीत पुर्ण करतलो अशें दिशिल्लें. पूण, 50 बॉलांनी 92 धांवड्यो करून तो बाद जालो.
ते पयलीं चेन्नय सुपरकिंग्साची सुरवात बाबत जाली. फकत 14 धांवड्यांचेर डॅव्हॉन कॉन्वेच्या रुपान पयलो धपको बसलो. पूण, दुसरो ओपनर ऋतुराजान एक बाजू सांबाळून धरून अर्द शेंकड्याची खेळी केली.
ऋतुराजाक सोडलो जाल्यार चेन्नय सुपरकिंग्सा वतीन एकाय बॅट्समनाक व्हड खेळी करपाक जमली ना. मोईन अलीन 23 धांवड्यांचें योगदान दिलें, जाल्यार मुखेली महेंद्रसिंग धोनीन एक चवको आनी एक सको मारून पंगडाची धांवसंख्या 178चेर पावयली. ताणें सात बॉलांनी नाबाद 14 धांवड्यो केल्यो.
गुजरात टायटन्सा वतीन राशिद खान, अल्झारी जोसेफ आनी मोहम्मद शमी हांणी दरेकी दोन विकेटी घेतल्यो. जोशुआ लिटलान एक विकेट मेळयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
