आयज दनपार मेरेन सरकारी नोकऱ्यांचो अहवाल दियात

भांगरभूंय | प्रतिनिधी

मुख्यमंत्र्याचो सचिवांक निर्देश; नोकर भरतीचे प्रक्रियेक गती

पणजी: अर्थसंकल्पीय अधिवेशन सोंपतकूच मुख्यमंत्री डॉ. प्रमोद सावंत हांणी सरकारी खात्यांतली नोकर भरतीची प्रक्रिया गतीन केल्या. सगल्या सचिवांक आपआपल्या खात्यांतल्या रित्या पदांचो अहवाल शेनवारा दनपारां 1 वरां मेरेन सादर करपाचे निर्देश तांणी दिल्यात. ते प्रमाण सचिवांनी लेगीत अहवाल तयार करपाचें काम सुरू केलां.

पोरूं वर्सा ज्या खात्यांतलीं रितीं पदां भरपाची प्रक्रिया सुरू आशिल्लीं, तीं पदां रोखड्या रोखडीं भरून उपरांत सरकारी खात्यांतल्या प्युना सावनचीं पदां कर्मचारी भरती आयोगा वतीन (स्टाफ सिलेक्शन कमिशन) भरपाची प्रक्रिया मुख्यमंत्र्यांनी सुरू केल्या.

ते खातीर बाराय सचिवां कडल्यान तांणी शेनवारा दनपार मेरेन नोकर भरतीची प्रक्रिया कशे पद्दतीन सुरू आसा आनी तांचे कडल्या खात्यांनी रितीं पदां कितलीं आसात हाचो अहवाल मागयला. सचिवां कडल्यान अहवाल सादर जाले उपरांत फाटल्या वर्सभरांत जीं पदां भरपाची प्रक्रिया सुरू आशिल्ली त्या प्रक्रियांक गती दिवन कांय दिसां भितर तीं पदां भरतले आनी उपरांत कर्मचारी भरती आयोगा वतीन सरकारी नोकरभरती सुरू जातली अशी म्हायती गोपांनी दिली.

मजगतीं, कांय दिसां पयलीं गोंय सरकारान कर्मचारी भरती आयोगाक पाटो-पणजेंतल्या स्पेसीस इमारतींत कचेरे खातीर सुवात, कर्मचारी आनी निधीक दिला. कर्मचारी भरती खातीरचे निकश तयार करून ते सरकाराचे मंजुरी खातीर धाडून दिल्या. आयोगा कडल्यान लेखी आनी सीबीआरटी (कम्प्युटरबेस) अशा दोनूय पद्दतीन परिक्षा घेवपा विशीं विचार सुरू आसा. सरकारी कर्मचाऱ्यांची भरती प्रक्रिया पारदर्शक पद्दतीन जावची हे खातीरूच सरकारान हो निर्णय घेतला.

मजगतीं, सरकारी नोकऱ्यो मेळोवपा खातीर नागरिकांनी हाचे आदीं राजकारण्यां कडेन वचचें पडटालें. तातूंतल्यान व्हड प्रमाणांत फावोर, भ्रश्टाचार पातळिल्लो. ताका लागून सरकारी खात्यांतली नोकर भरती कर्मचारी भरती आयोगा वतीन करपाचो निर्णय मुख्यमंत्री डॉ. प्रमोद सावंत हांणी फाटल्या वर्सा घेतिल्लो आनी ते प्रमाण आयोग स्थापन करपाची प्रक्रिया लेगीत सुरू केली.

जानेवारी 2023 सावन कर्मचारी भरती आयोगाचें काम प्रत्यक्ष सुरू जातलें अशी हमी मुख्यमंत्र्यांनी दिल्ली. ताका लागून सरकारी नोकरेचीं सपनां पळोवपी तरणाटे आयोगा कडेन दोळे लावन बसल्यात. पूण कांय कारणांक लागून सरकारा कडल्यान तें शक्य जावंक शकूंक ना. पूण सरकारी नोकर भरतीच्यो हालचाली आतां गतीन जाल्ल्यान फुडल्या कांय म्हयन्यांत आयोगा वतीन भरती सुरू जावपाची शक्यताय आसा.

मुख्यमंत्र्यांक जाय पारदर्शकताय

– सरकारी नोकऱ्यांनी व्हड प्रमाणांत भ्रश्टाचार जायत आशिल्ल्याचो दावो सत्ताधारी पक्षांतले कांय मंत्री, आमदारांनी केले उपरांत सरकारी नोकर भरतींत पारदर्शकताय हाडपा खातीर कर्मचारी भरती आयोगाची स्थापणूक करपाचो निर्णय मुख्यमंत्र्यांनी घेतलो.

– कर्मचारी भरती आयोगा वतीन सरकारी खात्यांतल्या पदांची भरती सुरू जाले उपरांत तातूंत कोणाकूच हस्तक्षेप करूंक येवचो ना. प्युना पसून ते उच्च पदां मेरेनचे भारती खातीर लेखी परिक्षा, मुलाखती अशा प्रक्रियांतल्यान उमेदवारांक वचचें पडटलें. ताका लागून त्या त्या पदांचेर पात्र उमेदवारांचीच नेमणूक जातली. ताचो प्रशासना खातीर मोटो फायदो जातलो असो विस्वास मुख्यमंत्र्यांनी सेगीत उलोवन दाखयला.