भांगरभूंय | प्रतिनिधी
नुस्तें विक्रेते संघटणेची मागणीः म्हापशें पालिकेक निवेदन
भांगरभूंय । प्रतिनिधी
म्हापशें: म्हापशें पालिका वाठारांतल्या नुस्त्यां मार्केटांत शौचालय आनी हेर गरजेच्यो सुविधा दिवच्यो, अशी मागणी म्हापशें नुस्तें विक्रेते संघटणेन निवेदना वरवीं पालिके कडेन मागणी केल्या.
संघटणेची अध्यक्ष शशिकला गोवेकार आनी हेर पदाधिकाऱ्यांनी नगराध्यक्ष प्रिया मिशाळ हांची भेट घेवन तांकां आपल्या मागण्यांचें निवेदन सादर केलें.
नुस्त्यां मार्केटांत आमी फाटल्या कितल्याशाच वर्सां सावन नुस्तें विक्रीचो वेवसाय करतात. लोकांक नितळ आनी खावपाक योग्य अशें नुस्तें उपलब्ध करून दितात. सकाळीं तें रातच्या 8 वरां मेरेन आमी हो वेवसाय करतात. पूण मार्केटांत वेवसाय करतना आमकां नुस्तें विक्रेत्यांक खूबशा समस्यांक फुडो करचो पडटा, अशें निवेदनांत म्हणलां.
ह्या मार्केटांत पियेवपाच्या उदकाची वेवस्था ना. आमी दीसभर मार्केटांत बसतात, मात थंय शौचालयाचो उणाव आसा. मार्केट इमारतींत आशिल्लें शौचालय फाटल्या कितल्याशाच वर्सां सावन बंद आसा. मार्केटांत उदक आनी वीज पुरवणेचोय उणाव आसा. अशा लज दिसपा सारक्या वातावरणांत आमकां दीस काडचे पडटात. हें मार्केट बांदतना आमी शौचालय आनी विसव घराची मागणी केल्ली. ह्या म्हत्वांच्या सुविधां विशीं कितलेशेच खेपे मागणी केल्या. हाची दखल पालिके कडल्यान घेनात, अशें संघटणेन म्हणलां. नुस्तें विक्रेत्यांच्या हिता खातीर ह्यो म्हत्वाच्यो सुविधा पालिकेन दिवच्यो, तशेंच नुस्त्यां मार्केट इमारतीच्या प्रवेशदारा वयलीं पांचूय शॅटरां बदलचीं, अशी मागणी निवेदनांत केल्या. मजगतीं, नगराध्यक्ष प्रिया मिशाळ हांणी आमच्या निवेदनांतल्या मागण्यां विशीं सहानुभुतीपूर्वक विचार करून ह्यो सुविधा दिवपाचो यत्न करतले, अशें आस्वासन दिल्ल्याचें संघटणेची अध्यक्ष शशिकला गोवेकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
