भांगरभूंय | प्रतिनिधी
भांगरभूंय । प्रतिनिधी
पणजीः गोंयांत राष्ट्रीय शिक्षणीक धोरण चालीक लावपा संबंदी बरी प्रगती केल्या. फुडाराक राज्यांतली सगळीं म्हाविद्यालयां नॅक नामांकीत जातली. ती नॅक मानांकीत करप हेंच उच्च शिक्षण खात्याचें ध्येय आसा, अशें खात्याचो संचालक प्रसाद लोलयेकार हाणे सांगलें. पर्वरी उच्च शिक्षण खात्यान राष्ट्रीय मोलावणी आनी मान्यताय परिशद ( एनएएसी) बंगळुरू हांच्या जोड पालवान आयोजीत केल्ले कार्यशाळेंत ते उलयताले.
नॅकाक लागून शिक्षणांतली गुणवत्ता सुदारल्या आनी दर्जो वाडत आसा. राज्यांतल्या म्हाविद्यालयांनी नॅक मान्यताये खातीर आपली गुणवत्ता दाखोवन दिल्या. अभियांत्रिकी, वैजकी, गृह विज्ञान, संगीत, कृशी आनी हॉस्पिटेलिटी म्हाविद्यालयांचो तांतूतलो वांटो तुस्त करपा सारको आसा, अशें लोलयेकारान सांगलें. कार्यशाळेंत नॅकाचे बंगळुरूचे उप सल्लागार डॉ प्रशांत परहाड हांणी मार्गदर्शन केलें. तांणी नॅकाची मोलावणी आनी मान्यताय प्रक्रियेची खोलायेन म्हायती दिली. हे प्रक्रियेंत आशिल्ल्या वेगवेगळ्या निकशांची तांणे म्हायती दिली.
26 म्हाविद्यालयांची प्रक्रिया पुराय
उच्च शिक्षण खात्या खाला येवपी 39तल्या 26 म्हाविद्यालयांनी नॅक प्रक्रिया पुराय केल्या. राज्यांतल्या गैर मोलावणी उच्च शिक्षण संस्था खातीर मोलावणी आनी मान्यताय प्रक्रिया ह्या विशया वयले हे कार्यशाळेंत राज्यांतल्या उच्च शिक्षण संस्थातले 64 प्राध्यापक आनी प्राचार्यांनी वांटो घेतल्लो. उच्च शिक्षण खात्याचे उपसंचालक आनी कार्यशाळेंच मुखेल समन्वयक प्रा एफ एम नदाफ हांणे सूत्रसंचालन केलें. पालवी संचालक भक्ती नायक हिणे निमाणे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
