भांगरभूंय | प्रतिनिधी
लेखक, संगीतकार, चित्रकार, फोटोग्राफर, प्राध्यापक अश्या कितल्याश्याच गुणांनी संपन्न आशिल्ले विली गोएस. आल्तिन,
पणजेच्या गोवा कला महाविद्यालयांत उपयोजीत कला विभागाचें (अॅप्लायड आर्ट) मुखेलपद सांबाळपी विली गोएस फुडल्या म्हयन्या सावन म्हणल्यार 1 एप्रीलच्यान कला महाविद्यालयाच्या प्राचार्यापदाचो अतिरीक्त ताबो घेवपाचे आसात. तांच्या विद्यादानाची दखल घेवन, तांचें साहित्यीक योगदान मतींत घेवन आनी तांणी केल्लो समाजीक वावर लक्षांत दवरून दाल्गाद कोंकणी अकादमीन तांच्या वाडदिसाच्या दिसा म्हणल्यार 28 मार्चाक तांचो सत्कारूय केला.
कलाकार चड उलयनात, पूण आपले कलेंतल्यान खूब कितें सांगतात. मागीर तो चित्रकार जावं, गायक जावं, संगीतकार जावं, फोटोग्राफर वा साहित्यकार जावं, तो कलेंतल्यान समाजाक संदेश दीत आसता, न्हय तें ताचें कर्तव्यूच. संगीतकार वाद्यांतल्यान, नर्तक नृत्यांतल्यान, चित्रकार रंगांतल्यान, लेखक शब्दांतल्यान, गायक आलापांतल्यान, फोटोग्राफर कल्पकतेंतल्यान आनी कलाकार आपले कुशळटायेंतल्यान समाजांत आपली वेगळी वळख निर्माण करतात. तांची ही वळखूच तांकां प्रसिद्धीचे तेंगशेर व्हरून पावयता, अशें म्हणल्यार तें लटीक थारचें ना.
विली गोएस ही अशीच एक व्यक्ती जांणी प्राध्यापक, फोटोग्राफर, संगीतकार आनी लेखक म्हणून नांव जोडलां, पूण कलेचीं हीं कितलींशींच तासां आसुनूय तांकां तीं मिरोवपाचीं संवय ना. कारण अहंकाराक तांणी आपणाक आफडूंक दिवंक ना आनी तांच्या ह्याच खाशेल्या गुणान तांणी मनशां जोडल्यांत. विली कडेन उलयतना तांच्या सौम्य आनी म्होंवाळ सभावाचें दर्शन घडटा. नमळायेची देणगी लाबिल्ले हे व्यक्ती कडेन इतले गूण आसूंक शकतात, हाचेर विस्वासूच बसना.
तांणी काडिल्ले वेगळ्यावेगळ्या पोझींतले, शैलींतले, धाटणींतले फोटे तर इतले अफलातून आसतात की ते पळयत रावचे अशे दिसतात आनी विली हांचे कल्पनाशक्तीची, कल्पकतायेची आनी कुशळटायेची तोखणाय करीन दिसता. एकाद्र्या गायकाक ते जेन्ना व्हायोलीनाचेर वा गिटाराचेर सांगात दितात तेन्ना तें वाजयतना ते तल्लीन तर जातातूच, पूण त्याच वांगडा व्हायोलीनांतल्यान वा गिटारांतल्यान आयिल्ले सूर आयकतना आयकुपीय गुल्ल जातात.
‘गुलाब’ हें रोमी लिपयेंतलें नेमाळें जावं, ‘गोवा टुडे’ हें इंग्लीश म्हयनाळें वा ‘सुनापरान्त’ हें देवनागरी दिसाळें जावं विली गोएस हांच्यो उजवाडा आयिल्ल्यो कथा वाचनीय आसतात. तांच्यो कथा निखट्यो मनरिजवणूच करिनात जाल्यार वाचकांक अंतर्मुख जावंक लायतात. समाजप्रबोधनूय करतात. तांच्यो कथा वा कादंबरी वाचतना वाचक इतलो गुल्ल जाता की ती कथा वा कादंबरेचो शेवट वाचले बगर ताका सूख लागना.
कला ही देवान दिल्ली देण. ती कशी फुलोवप, केळोवप, वाडोवप हें फकत मनशाच्या हातांत आसता. पूण ते खातीर संयम, सराव, अभ्यास, तालीम आनी साधना जाय आसता. विली हांकांय अशीच साधना करची पडल्या, तान-भूक विसरून कलेक न्याय दिवचो पडला, तन-मन ओंपून वावुरचें पडलां, कश्ट करचे पडल्यात. सांगपाचें म्हणल्यार विली हांकांय मान- सन्मान मेळोवपा खातीर खूब संघर्श करचो पडला.
विली गोएस हांकां ल्हानपणा सावन संगिताची आवड आसली. सवे यत्तेंत शिकतना तांणी सेंट सिसिलिया म्युझिक स्कूलांत प्रवेश घेतलो. थंय तांणी व्हायोलिनाचें आनी गिटाराचें मुळावें शिक्षण घेतलें. उपरांत मावथ आॅर्गन, बुलबुलतरंग आदी वाद्यांचेर प्रभुत्व मेळयलें. ट्रंपेट आनी युकेलेले हीं वाद्यांय ते फिशालकायेन वाजयतात.
ल्हान आसतनाच गोएस हांकां फोटोग्राफीची आवड आसली. फावता तेन्ना ते चित्रांय पितारताले. तांचो तो छंद आसलो. तांणी काडिल्लीं चित्रां पळोवन तांचे कला शिक्षक शांताराम आमोणकार हांणी तांकां गोवा आर्ट काॅलेजीक प्रवेश करपाक सुचयलें. धावी पास जाले उपरांत विली गोएस हांणी गोवा कला महाविद्यालयांत प्रवेश घेतलो. हांगा शिकतनाय ते दिसाळ्या खातीर फोटो पत्रकार म्हणून काम करताले.
ल्हानपणांतूच विली हांकां वाचनाची आवड आसली. वाचतां वाचतां आपणेंय बरोवचें अशें तांकां दिसलें. तांणी आपली प्रतिभा जागयली आनी लिखाणाक सुरवात केली. तांची लिखाणाची कारकीर्द जरी इंग्लीश भाशेंतल्यान जाल्ली आसली तरी रगतांत भरसल्लो, शिरंतरांनी खतखतपी कोंकणी विशींचो मोग तांकां कोंकणी कडेन घेवन गेलो. ते कथा बरोवंक लागले. तांचीं आतां मेरेन सात कोंकणी आनी दोन इंग्लीश मेळून 9 पुस्तकां उजवाडा आयल्यांत. तातू्ंत चार कादंबऱ्यो, एक बालसाहित्य, एक लघूकादंबरी आनी तीन कथासंग्रह आसात.
कोंकणी भाशा मंडळाचो साहित्य पुरस्कार, थाॅमास स्टीवन्स कोंकणी केंद्राचो जॅक सिक्वेरा पुरस्कार, अखील भारतीय कोंकणी लेखक संघाचो पुरस्कार, फोटोग्राफी आनी ग्राफीक डिझायनांतलो राज्य कला पुरस्कार, गुलाब पुरस्कार अश्या कितल्याश्याच पुरस्काराचे ते मानकरी थारल्यात. ‘तुमकां कथा कश्यो सुचतात ?’ अशें विचारल्यार विली सांगतात, ‘म्हाका भोंवपाची आवड. गांव पळोवपाची आवड. हांव गांवांतल्या लोकां कडेन उलयतां. तांच्यो व्यथा आयकतां आनी तातूंतल्यान म्हाका कथाबीज मेळटा. म्हजे कथेंतलीं पात्रां गांवचींच आसतात. आमचेच सरभोंवतणी घुटमळपी. सादी, सोपी, सुटसुटीत आनी संवकळीचे भाशेंत हांव बरयतां आनी ताका लागून कथा वाचकांक भावतात. कथेंतल्यान वाचकांक आनंद मेळचो आनी समाजप्रबोधन जावचें, होच म्हजो उद्देश आसता.’
अशें हें अश्टताशी व्यक्तीमत्व 1 एप्रीलच्यान गोवा कला महाविद्यालयाची धुरा खांदार घेवपाचें आसा. हें शिवधनुश्य पेलूंक विली गोएस हांकां देवान शक्त दिवं आनी तांच्या हातांतल्यान विधायक वावर जावन गोवा कला महाविद्यालयाची व्हडविकाय फकत गोंयांतूच न्हय जाल्यार गोंया भायर फांकूं, इतलेंच देवा कडेन मागणें.
अतुल र. पंडित
9623269013
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
