भांगरभूंय | प्रतिनिधी
रवी नायकः फोंड्यां भुंयगत वीज केबल घालपाक सुरवात
भांगरभूंय । प्रतिनिधी
फोंडें: भाजपा सरकारान देशाची उदरगत करून लोकांक सुविधा दिवपाचो यत्न यत्न येसस्वी थारला. प्रधानमंत्री नरेंद्र मोदी आनी मुख्यमंत्री डॉ. प्रमोद सावंत हांच्या फुडारपणा खाला खूबश्यो येवजण्यो लोकां खातीर चालीक लायल्यात. प्रधानमंत्री मोदी हांचे हात आनीक घटमूट करचे खातीर फुडले लोकसभा वेंचणुकेंत गोंयच्या दोनूय भाजपा उमेदवारांक जैतिवंत करात, असो उलो शेतकी मंत्री रवी नायक हांणी मारलो.
फोंडें मतदारसंघांत वीज खात्या वतीन 70 कोटी रुपया खर्च करून भुंयगत वीज केबल घालपाच्या कामाची सुरवात केले उपरांत शेतकी मंत्री रवी नायक उलयताले. ह्या वेळार आदले खासदार नरेंद्र सावयकार, नगराध्यक्ष रितेश नायक, जिल्हो पंचायत वांगडी प्रिया च्यारी, सरपंच नावेद तहशीलदार, नगरसेवक शांताराम कोलवेंकार, गीताली तळावलीकार, वीज खात्याचे मुख्य अभियंते स्टिफन फर्नांडीस, कार्यकारी अभियंते पी. पी. भरतन आनी हेर मानेस्त माचयेर हाजीर आशिल्ले.
गोंयांतल्या चडशा वाठारांनी वीज, उदक आनी दूद पुरवण फोंडें म्हालांतल्यान जाता. ताका लागून फोंडें म्हालाक अदीक म्हत्व मेळ्ळां. भोमा आनी बोरीच्या रस्त्याचो प्रस्न रोखडोच सोडोवपा खातीर मुख्यमंत्री डॉ. सावंत स्वता लक्ष दितात. ताका लागून सर्वसामान्य लोकांक गरजेच्यो सुविधा मेळोवन दिवचे खातीर सरकार येसस्वी थारलां, अशें मंत्री नायक हांणी सांगलें. ह्या वेळार नरेंद्र सावयकार, प्रिया च्यारी, गीताली तळावलीकार, रितेश नायक आनी स्टिफन फर्नांडीस हांणी आपले विचार मांडले. दीपा मिरींगकार हांणी सुत्रसंचालन केलें. केशव गावडे हांणी येवकार दिलो जाल्यार प्रवीण केरकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
