भांगरभूंय | प्रतिनिधी
उडपी जालें ‘पोयेटिका 16’ कोंकणी कविता संमेलन
पणजी: मंगळुरची माती कोंकणी साहित्याक परमळ दिता. हांगची सैम संस्कृती, रिती रिवाज, धर्मीक परंपरा पिळग्या पिळग्यांनी राखून दवरिल्लें अस्मितायेचें दायज, म्होंवाळ उतरां कोंकणी कवितेक साहित्याची खोलाय दिता, अशें कवी, गीतकार गौरीश वेर्णेकार हांणी सांगलें. ते उडपी हांगा जाल्ल्या निरंतर उदयवास हांणी घडोवन हाडिल्ल्या ‘पोयेटिका 16’ ह्या कविता संमेलनांत आमंत्रीत कवी ह्या नात्यान उलयताले.
ह्या संमेलनांत वाचिल्ले कवितेचें समालोचन आनी समीक्षण करतना वेर्णेकार हांणी सांगलें, पोयेटिका – 16 ह्या संमेलनांत सादर जाल्ल्यो कविता साहित्य मळार दर्जात्मक आनी अभ्यासपूर्ण आसात. तशेंच कवितेच्या साहित्यांत नव रसाचें दर्शन ह्या पोयेटिकांत घडिल्ल्याचें तांणी म्हणलें.
निरंतरा ही संस्था सतत कोंकणी नाट्य आनी काव्य मळार वावर करता. हे संस्थेचो वावर निरंतर जावचो आनी शाश्वत रुपान उरचे खातीर ह्या कवी संमेलनाक अनील अनी पेरनाल, जॉयसी पिन्टो, रुपेश देसाय, ऑल्टर डँटीस, रेनिशा डिसोझा, हॅनरी मस्कारिन्ह, मॅल्सी रॉड्रिग्ज, आल्वारीस डँट्रीस, रेमंड डिकुन्हा, प्रमीला फ्लाविया, ज्युलियट मोरायस, वलेरियन मँडोसा, गोडवील डिसोझा, साईश खोलकार, स्टेनीस लोस, ऑजवर्ड डिसोझा, एरिक डिसा, ज्यदीत फॅर्नांडीस, सिलीसिव रॉड्रिग्ज, विली येलपाड, रॉबर्ट डिसा, प्रिथन पेरेरा, लविता नरवरे आनी मर्वीन मस्कारेन्ह ह्या कवी कवियत्रींनी वांटो घेतलो.
ह्या वेळार पोयेटिका- 16 ची उत्कृश्ट कवियत्री म्हणून लवी गंजिमठा हाची नेमणूक जाली. कवी गीतकार नवीन पेरेरा हांणी कवितेचेर भाशण केलें. कवयित्री शब्दाचो अर्थ सांगलो.
हे कार्यावळीचें उक्तावण वेटसन दिया पेंगल आनी कोरलीन रॉड्रिग्ज चर्चीचे उपाध्यक्ष लॉरेन्स डिया हांणी केलें. सुरवातेक निरंतरा संस्थेचे अध्यक्ष रोशन कॉस्टो हांणी सगळ्यांक येवकार दिलो. दोतोर फ्लाविया कास्टेलिनो आनी स्टिव्हन कुलासो हांणी सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
