भांगरभूंय | प्रतिनिधी
गणपत नायक: बांदोड्यां 50 कोटींच्या जमनी पोंदा सरयो घालपाच्या कामाचो शुभारंभ
फोंडें : आतांचे वीज मंत्री सुदीन ढवळीकार हांणी ह्यान पयलीं बांदकाम खात्याच्या कामाक न्याय दिल्लो. ताका लागून वीज खात्याची लेगीत बर्या कामाची अपेक्षा वाडली. वीज खात्यांत फाटल्या एक वर्सांत व्हड बदल घडला. हो बदल हाडपाक वीज मंत्री सुदीन ढवळीकार हांचें व्हड योगदान आशिल्ल्याचें जिल्हो पंचायत वांगडी गणपत नायक हांणी सांगलें.
बांदोड्यां पंचायत वाठारांत सुमार 50 कोटी रुपया खर्च करून जमनी पोंदच्यान सरयो घालपाच्या कामाचो शुभारंभ जिल्हो पंचायत वांगडी गणपत नायक हांचे हस्तुकीं जालो. ह्या वेळार सरपंच सुखानंद कुर्पासकर, उपसरपंच चित्रा फडते, वीज खात्याचे मुखेल अभियंतो स्टिफन फर्नांडीस, कार्यकारी अभियंतो पी. पी. भरतन, सहाय्यक अभियंतो केशव गावडे आनी हेर पंच वांगडी माचयेर हाजीर आशिल्ले.
मडकय मतदार संघ राज्यांत आदर्श थारतलो
बांदोड्यां सारकिल्ल्या गांवगिर्या वाठारांत पावसांत लायटीची समस्या जाणवताली. जमनी पोंदच्यान लायटीच्यो सरयो घातिल्ल्यान ही लायटीची समस्या फुडाराक हांगच्या लोकांक सतावची ना. मडकय मतदार संघांत सुमार 300 कोटी रुपया खर्च करून जमनी पोंदच्यान लायटिच्यो सरयो घालपाचें काम पुराय जाल्या उपरांत राज्यांत हो मतदार संघ आदर्श थारतलो अशें गणपत नायक हांणी फुडें सांगलें.
मुखेल अभियंते स्टिफन फर्नांडीस हांणी आधुनीक युगांत वीज पुरणव म्हत्वाची थारता. दरेका कामांत विजेची गरज आशिल्ल्यान जमनी पोंदच्या लायटिच्या सरयांक लागून लोकांची समस्या पुरायेन सुट्टली अशें तांणी सांगलें.
ह्या वेळार सरपंच सुखानंद कुर्पासकार आनी केशव गावडे हांणी आपले विचार उक्तायले. चित्रा फडते हांणी सगळ्यांक येवकार दिलो. तशेंच दिपा मिरिंगकार हांणी कार्यावळीचें सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
