भांगरभूंय | प्रतिनिधी
आमदार जीत आरोलकार: मांद्रेंच्या 160 ज्येश्ठ नागरिकांक वाटलीं वळखपत्रां
पेडणें: मांद्रें मतदार संघाची उदरगत टप्प्याटप्प्यान करतलों. हे खातीर सरकाराचेंय सहकार्य मेळटा. तशेंच सरकाराची दरेक येवजण कुटुंबांतल्या दरेका वांगड्याक मेळोवन दिवपाचे यत्न चालू आसात. ताका लागून मांद्रें आनी तुयां डिजिटल सेवा सुरू केल्या. रोखडीच मोरजे हांगा डिजिटल सेवा सुरू करून जनतेक ताचो लाव मेळोवन दितलों. नागरिकांनी हे सेवेचो लाव घेवचो. अशें मांद्रें मतदारसंघाचे आमदार जीत आरोलकार हांणी सांगलें.
मांद्रें मतदार संघांतल्या ज्येश्ठ नागरिकांक वळखपत्रा वाटल्या उपरांत आमदार आरोलकार उलयताले. मांद्रें मतदार संघांतल्या 160 ज्येश्ठ नागरिकांक वळखपत्रां वाटलीं. ही कार्यावळ जीत आरोलकार हांच्या कार्यालयांत आयोजीत केल्ली.
सरकारा कडेन जायत्यो येवजण्यो आसात. ह्या येवजण्यांची म्हायती आपल्या मांद्रें आनी तुयें हांगच्या कार्यालयांतले कर्मचारी दितात. तशेंच ह्या दोनूय सुवातांचेर डिजिटल सेवा सुरू केल्या. नागरिकांनी त्या डिजिटल सेवेचो चडांत चड फायदो करून घेवचो. रोखडीच मोरजी हांगा डिजिटल सेवा सुरू जातली. सरकारी येवजण्यांचीं कागदपत्रां ऑनलायन कशीं भरचीं हे खातीर थंयचे कर्मचारी नागरिकांक मजत करतात. मोरजे बेगीन डिजिटल सेवा सुरू करून सरकाराची दरेक येवजण मतदारां मेरेन पावोवपाचो यत्न करतां अशें आमदार जीत आरोलकार हांणी सांगलें.
आधार आनी पॅन कार्ड लींक करतलों
आमदार जीत आरोलकार हांकां पत्रकारान आधार आनी पॅन कार्ड लींक करपाची येवजण सरकारान जाहीर केल्ले विशीं विचारलें तेन्ना तांणी, आधार पॅन कार्ड कार्यालयांत लिंक करून दिवपाक यत्न करतलों. गरजेवंत आनी जांची अर्थीक स्थिती दुबळी आसा असल्या लोकांचीं आधार आनी पॅन कार्डां लींक करपाक जी फी लागता ती आपूण भरतलों अशें आमदार आरोलकार हांणी म्हणलें.
टॅक्सी वेवसायिकांचो प्रस्न सोडयतलों
मांद्रे मतदारसंघांत पर्यटन हंगामांत व्हडा प्रमाणांत टॅक्सी वेवसाय चलता. हे संबंदीं तांचे प्रस्न आसात. ते प्रस्न सोडोवपाचो आमी यत्न करतात. ह्या वाठारांतल्या टॅक्सी वेवसायीकांनी मोपा विमानतळार कावंटर करपाचो आग्रो धरल्यार आपूण तांचो आमदार म्हणून तांचे फाटल्यान उबो रावन तांकां कावंटर दिवपाचे यत्न करतलों अशें आमदार आरोलकार हांणी एका प्रस्नाक जाप दितना सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
