भांगरभूंय | प्रतिनिधी
अंदुंच्या अर्थीक वर्साचो अर्थसंकल्प काल सादर जालो. सर्वांगी उदरगतीचे हावेस उक्तावपी ह्या अर्थसंकल्पांत सगल्यां खातीर सदळ हातान बरेंच कितें दिलां. हें सगलें चालीक लागलें जाल्यार गोंय कूस परतींतलें. पूण ते खातीर सरकारी यंत्रणांची साथ मेळपाक जाय… आनी समाजाचीय! मनीस इत्सा करता. सगलेंच पुराय जायना, पूण ताणें यत्न सोडूंक फावना. खंबीरपणान, विचार करून पावलां मुखार मारल्यार तेंगशेक पसून पांया कडेन हाडूं येता. अर्थसंकल्प हो गोवर्धन पर्वता सारको. एकजुटीन हात लागल्यारुच उखलपाचो!
अर्थसंकल्पांत साबार गजाली आसात. सगल्यांत पयलीं मात्तिल्ली गुन्यांवांची बेनुल्ल हाणची पडटली. ती आपशीच मातूंक ना, हेंय खरें. नवें पुलीस विधेयक येता. ताचे खाला खासा अॅप आसतलें. ताचे वरवीं खंडणी मागप्याची थेट कागाळ करपाक मेळटली खंय. हाचो अर्थ गोंयांत खंडणी माफिया आसा, असो जालो. मात तांचे आड कागाळ करप आनी उपरांत कारवाय करप, हें दिसता तितलें सोंपें न्हय. समजा, वंयूच शेत खाता, जाल्यार कागाळ करतलो कोणा कडेन? तरीय ह्या नव्या विधेयकान गोंयांतली गुन्यांवकारी आनी ड्रग्सांची त्सुनामी ना नपयत जाल्यार राज्य रातयां वयर सरतलें. फुडल्या शिक्षणीक वर्सा सावन शालेय पांवड्याचेर देशसेवेचेर अभ्यासक्रम शिकयतले. देशभक्ती, सेवेचो गुण प्रत्येक भुरग्या मदीं जायच. पूण तो फक्त घोशणा दिवपा पुरतो नासचो. समाजांत जगचें- वागचें कशें, नागरिकांचे हक्क, संविधान, कायदे कशें पाळप, भ्रश्टाचार- जातीयताय- धर्मांधताय- वशिलेबाजी हाचे पसून सदांच पयस कशे रावप, परोपकार, निसुवार्थीपण…. हांचें शिक्षण, संस्कार ल्हानपणार जावंक जाय. नव्या शिक्षण धोरणांत हें सगलें आसतलें? कुशळटाय उदरगत ही शालेय पांवड्यार जाल्यार दुदांत साकर. हातूंतल्यान विद्यार्थी मुखार आदर्श नागरीक जातले, वायटा पसून पयस रावतले. ते खातीर उपदेश, शिकवण, मार्गदर्शन, शिबीर घेवपाची गरज पडू नये.
दिव्यांगां खातीर खाशेल्या खात्याची घोशणा ही अंदुंच्या अर्थसंकल्पाची खाशेली गजाल म्हणची पडटली. तांचे खातीर युनिक डिसेबिलीटी (युडीआयडी) कार्ड आसा. गोंयांतल्या सगल्या दिव्यांगांक तें बेगोबेग मेळचें. गोंयांत दिव्यांगांचो आंकडो नदरेंत भर सारको आसा, हें फाटीं पर्पल फेस्ता वेळार दिसून आयलां. तांकां सहानुभुतीची गरज ना, तर स्वावलंबी जावपा खातीर मजतीचो हात जाय. वेगळें खातें जाल्यार कामां बेगीन जातलीं. ते खातीर दिव्यांगांक पयलीं इमारती, येरादारी सुविधा सोंपी करची पडटली. मुख्यमंत्री देवदर्शन येवजणे खातीर 10 कोटींची तरतूद केल्या. मानसीक तणाव वाडल्यात. तांकां, श्रद्धावानाक, ज्येश्ठ नागरिकां खातीर ही येवजण गरजेची. ताचेच वांगडा विद्यार्थी आनी तरणाट्यां खातीर विज्ञान दर्शन येवजण चालू करची. विज्ञान केंद्रां, जंतरमंतर, अणुकेंद्रां, व्हडले कारखाने, इस्रो, विज्ञानिकांचीं स्मारकां… जालेंच जाल्यार सैमा खातीर प्रसिद्ध आशिल्लीं थळां तांकां दाखोवचीं. हातूंतल्यान आवड निर्माण जातली. भावी तंत्रज्ञ, विज्ञानीक घडटले. अंधश्रद्धा पयस जातल्यो.
सरकारी राजपत्र कोंकणींतल्यान जातलें, हाचो आनंद सगल्यांक जाला आसतलोच. कोंकणी अकादेमीय जाग्यार पडली, वर्साचीं वर्सां आडकून पडिल्ले सरकारी साहित्य पुरस्कार सुरू जाले जाल्यार तो आनंद दुपेट जातलो! शिक्षण खात्यान प्रत्येक तालुक्यांत दरेकी पांच तरी कोंकणी माध्यमांच्यो शाळा सुरू करपाच्या वावराक लागपाक जाय. मुळाव्या पांवड्याचेर चड भर आसचो. संमेलनां जातात, तातूंतले थारावूय वर्सा भितर चालीक लागचे. भाशीक संस्थांचो सरकाराक तेंको आसाच.
मुख्यमंत्री गोधन येवजण यशस्वी जातली जाल्यार कामधेनू येवजणेक जैत मेळचें पडटलें. फकत अनुदानाचेर दोळो दवरून मातयेंत हात घालपी व्यक्ती मेळ्ळ्यार ही येवजण उजवाडाचें किरण पळयत हाची खात्री ना. गोमूत्र, गोमय हांचे पसून निर्माण जावपी कांय उत्पादनां खूब खपतात. लघुउद्देग म्हूण तो स्विकारल्यार फायदो आसा. पूण ते खातीर गोरवां जाय, तांची गोठ्यांत कुयदाद जावंक जाय. रस्त्या वयल्या अपघातांक तीं कारण थारचीं न्हय. सरपंच, पंचांचें मानधन वाडलां. म्हणटकच पंचायतींतलीं सगलीं कामां कायदेशीर मार्गान फटाफट जातलीं, अशी आस्त. मानधन वाडीचो हो आनंद पंचायतींनी सुणी- गोरवांचें कोंडवाडे, कोयर विलो वेवस्था सुरू करून मनोवचो. भ्रश्ट, आळशी, कामचुकार सरकारी कर्मचाऱ्यांक सक्तीची व्हीआरएस दितले, ही पोरणी येवजण ह्या अर्थसंकल्पांतूय आसा. कर्मचारी अंदूं तरी ती मनार घेतले, हे खातीर उपाय घेवचे पडटले. खंडणी घेवप्यांची कागाळ करपाक अॅप तयार केलाच, तातूंत भ्रश्ट, कामचुकार सरकारी कर्मचाऱ्यां खातीरुय एक जागो दवरचो……. अर्थसंकल्प 100 टक्के चालीक लागूं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
