भांगरभूंय | प्रतिनिधी
इंडियन प्रिमीयर लिगेच्या (आयपीएल) 16व्या हंगामांतल्या लीग पांवड्या वयल्या कांय मॅचींनी रोहित शर्माक विसव दिवपाक दिवपाक कसलीच समस्या ना. पूण, ते खातीर ताणें फॉर्मांत येवप गरजेचें आसा अशें मुंबय इंडियन्साचो मुखेल प्रशिक्षक मार्क बावचरान म्हणलां.
फाटल्या आयपीएलांत मुंबय इंडियन्सान सामकें बाबत प्रदर्शन केल्लें. तो गुणतकट्यांत निमाणे सुवातेर उरिल्लो. पूण, हे खेपे आपल्या प्रदर्शनांत सुदारणां करपाचो ताचो यत्न आसतलो.
मुंबय इंडियन्स आपली पयली मॅच 2 एप्रीलाक रॉयल चॅलेंजर्स बंगळुरू आड चिन्नास्वामी स्टेडियमाचेर खेळटलो. हे खेपे मुंबय इंडियन्स आपल्या खेळगड्यांच्या वर्कलोड मॅनेजमॅण्टाचेर लक्ष्य दितली अशी आस्त आसा. हे वळेरेंत रोहित शर्माचेंच नांव सगल्यांत मुखार आसा. हाचें फाटलें मुखेल कारण म्हणल्यार वर्साचे अखेरेक जावपी संवसारीक वन डे क्रिकेटींत रोहित शर्मा टीम इंडियाचें फुडारपण करतलो.
रोहित शर्मा पंगडाचो मुखेली आसा. तो रोखडोच फॉर्मांत येतलो अशी आस्त आसा. तशें पळोवपाक गेल्यार रोहित लेगीत विसव घेवपाक इत्सूक आसचो ना. पूण, परिस्थिती प्रमाण आमी निर्णय घेतले अशें रोहित शर्माच्या विसव घेवपाच्या प्रस्नाक जाप दितना बावचरान सांगलें.
फाटल्या हंगामांत रोहित शर्माक म्हणपा सारकें प्रदर्शन करपाक जमूंक नाशिल्लें. ताणें 14 मॅचींनी 19.14चे सरासरीन फकत 268 धांवड्यो केल्ल्यो.
जर रोहित एक मुखेली आनी खेळगड्याच्या रुपान बरें प्रदर्शन केल्या उपरांत एक वा दोन मॅचींनी विसव घेवपाक सोदता तर ताका विसव दिवपाक आपूण तयार आसा अशें बावचरान मुखार सांगलें.
अंदूंच्या आयपीएलांत इम्पॅक्ट खेळगड्याचो नेम लेगीत लागू जातलो. ह्या नेमाचेर उलयतना रोहित शर्मान म्हणलें, ह्या नेमाचो अश्टतासांच्या खेळगड्यांचे भुमिकेचेर कसलोच परिणाम जावचो ना.
ह्या नेमा प्रमाण इम्पॅक्ट प्लेयरा कडल्यान केन्नाय बॅटींग वा बॉलींग करून घेवपाक शकतात.
मजगतीं, रोहित शर्माक विसव दिलो जाल्यार ताचे सुवातेर सुर्यकुमार यादव मुंबय इंडियन्साचें फुडारपण करपाक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
