भांगरभूंय | प्रतिनिधी
न्हंयेंत बुडपी तिगां इश्टांक वाटायले; वीर पुरस्कार दिवपा चीमागणी
माशेल: कुमारजुवेंचे सरकारी मुळावे शाळेंत यत्ता 4 थेच्या वर्गांत शिकपी आनी कुमारजुव्यां रावपी अंकुरकुमार संजय प्रसाद हांणी आपलो जीव धोक्यांत घालून विजयकुमार, आर्यन होसपेट आनी मुकेश ह्या कुमारजुयां न्हंयत बुडपी तीग भुरग्यांचो जीव वाटायलो. ह्या असामान्य धाडसा विशीं कुमारजुवें वाठारांत आनी शाळेच्या पालक शिक्षक संघा वतीन तांकां परबीं भेटयलीं.
सध्या कुमारजुवेंकारांची श्री शांतादुर्गा कुमारजुवेंकरीण देवीची पालखी संवसार पाडव्या सावन घराघरांनी भेट दिता. ताका लागून कुमारजुव्यां उमेदीचें वातावरण सगळे कडेन पातळ्ळां. शेनवार ता. 25 मार्चाक सुमार 3.30 वरांचेर देवीची पालखी सुरचेभाट हांगा पाविल्ली. सगळे उमेदीन देवीक आपल्या घरांत येवकार दिवपाचे तयारेंत गूंग आशिल्ले. ल्हान भुरगीं तशेंच हेर एकामेकाक गुलाल लावन पालखेची खोस मनयताले. तांतल्या विजय कुमार, आर्यन आनी मुकेश ह्या तिगां मदल्या एकाच्या दोळ्यांत गुलाल गेलो आनी तो धुवपा खातीर ते तिगूय कुमारजुवेंच्या न्हंयच्या पात्रा लागसारा गेले. तोंड धुंवन ते पांय धुतना निसरून न्हंयत पडले आनी बुचकळपाक लागले. त्या तिगांयकूय पेंवपाक येनाशिल्लें. थंयच्यान सायकलीन वचपी तांचो इश्ट अकुंरकुमार संजय प्रसाद हांणी तांकां पळयले आनी लोकांक सांगलें. पूण कोणेंच मनार घेवंक ना. उपरांत तांणी स्वताच आपल्या जिवाची पर्वा करिनासतना बरेच कश्ट घेवन त्या तिगांयकूय उदकांतल्यान वयर काडले. स्वताच तांचेर गरजेचो प्रथमोपचार करून तांच्या नाका तोंडांत गेल्लें उदक भायर काडलें.
तांतलो विजयकुमार हो अस्वस्थ आशिल्लो तो मेरेन लोक थंय एकठांय जाले आनी विजय कुमाराक बांबोळे हॉस्पिटलांत व्हेलो. सध्या ताचे परिस्थितींत बरोच सुदार आसा. तो आनी मुकेश हे दोगूय शारदा विद्यालय सरकारी हायस्कूल कुमारजुव्यां 7वेच्या वर्गांत शिकता. आर्यन हो अकुंरकुमार शिकता ते शाळेंत यत्ता 3रेच्या वर्गांत शिकता.
धा पिरायेच्या यत्ता 4त सरकारी मुळावे शाळेंत कुमारजुव्यां हांगा शिकपी अंकुरकुमार संजय प्रसाद हांच्या असामान्य धाडशीपणा आनी योग्य वेळाक लागून त्या तिगाय भुरग्यांचो जीव वाटावलो, अशी चर्चा पुराय कुमारजुव्यां चालू आसा. विजयकुमार हो बिहार हांगचो आशिल्ल्यान आपली आवय बापूय आनी भयणीं वांगडा तो कुमारजुयां रावता. शिक्षण खात्यान ह्या अंकुरकुमाराच्या धाडशीपणाची दखल घेवन ताका वीर पुरस्कार दिवचो अशी मागणी हांगच्या लोकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
