आयपीएलाक दुखापतीचें गिराण

भांगरभूंय | प्रतिनिधी

इंडियन प्रिमियर लिगेच्या (आयपीएल) 16व्या हंगामाक सुरवात जावपाक फकत दोन दीस बाकी आसात. पूण, सर्त सुरू जावचे वयलींच खेळगड्यांक दुखापती जाल्यात. साबार स्टार खेळगडे अंदूंच्या हंगामांत खेळटना दिसचे नात.

दुखापतीचे वळेरेंत जसप्रीत बुमरा, ऋषभ पंत, जॉनी बॅयरस्टो, कायल जेम्सन, विल जॅक्स, श्रेयस अय्यर, प्रसिद्ध कृष्णा हांचो आस्पाव आसा. जोश हेझलवूड, रजत पाटीदार, मोहसीन खान, ल्योकी फर्ग्युसन, मुकेश चौधरी हांचो लेगीत खेळपा विशीं दुबाव आसा.

रॉयल चॅलेंजर्स बंगळुरू आनी चेन्नय सुपरकिंग्स हे क्रिकेटरांचे दुखापतीक लागून चड प्रभावीत जाल्ले देश आसात. जाल्यार सनरायझर्स हैदराबाद आनी सध्याचो वस्ताद गुजरात टायटन्स हांकां पंगडांक दुखापतीचो फटको बसूंक ना.

दुखापतीक लागून दिल्ली कॅपिटल्स आनी कोलकाता नायटरायडर्स हांकां मुखेली बदलचे पडले. अंदूंच्या हंगामांत ऋषभ पंताचे सुवातेर दिल्ली कॅपिटल्साचें फुडारपण ऑस्ट्रेलियेचो डॅव्हिड वॉर्नर करतलो. जाल्यार कोलकातान श्रेयसाचे सुवातेर नितीश राणाक मुखेलपदाची जापसालदारकी दिल्या.

ऑस्ट्रेलिये आडचे चवथे टॅस्टी वेळार श्रेयसाक दुखापत जाल्ली. ताका लागून ताचो आयपीएलांत खेळपा विशीं दुबाव आसा. न्युझिलॅण्डाचो फास्ट बॉलर ल्योकी फर्ग्युसनाक दुखापत जाल्ल्यान ताका कोलकाता वतीन सुरवातीच्यो मॅची खेळपा विशीं दुबाव आसा.

रॉयल चॅलेंजर्स बंगळुरू वतीन फाटल्या हंगामांत 152.75चे स्ट्रायक रेटीन 333 धांवड्यो करपी रजत पाटीदार आनी ताचो फास्ट बॉलर जोश हेझलवुडा विशीं लेगीत दुबाव आसा.

पाटीदाराचे खोटेचे दुखापतीचेर राष्ट्रीय क्रिकेट अकादमींत उपचार चालू आसात. जाल्यार हेझलवुडाक दुखापतीक लागून बॉर्डर-गावस्कर ट्रॉफींत खेळूंक नाशिल्लो. बंगळुरू वतीन खेळपी इंग्लंडाचो बॅट्समन विल जॅक हाका लेगीत दुखापत जाल्या. ताचे सुवातेर न्युझिलॅण्डाच्या मायकेल ब्रेसवेलाची निवड केल्या.

तशेंच फाटल्या हंगामांत चेन्नय सुपरकिंग्सा वतीन 13 मॅचींतल्यान 16 विकेटी घेवपी दावखुरो बॉलर मुकेश चौधरी लेगीत एनसीएंत फाटीचे दुखापतीचेर उपचार घेता. अंदूंच्या हंगामांत तो केन्ना उपलब्ध जातलो हें अजून निश्चीत ना. न्युझिलॅण्डाचो अश्टतासांचो खेळगडो कायल जेमिसनाची गैरहाजेरी चेन्नय सुपरकिंग्सा खातीर मोठो धपको आसा. ताचे सुवातेर दक्षीण आफ्रिकेच्या सिसांडा मगाला हाका संद दिल्या.