भांगरभूंय | प्रतिनिधी
भांगरभूंय । खबरां मेज
पणजीः सेव्ह म्हादय सेव्ह गोवाच्या शिश्टमंडळान पणजे म्हानगरपालिकेचो म्हापौर रोहित मोन्सेरात हाका निवेदन भेटोवन म्हादय न्हंय वाठार वाग राखीव वाठार म्हणून मागणी करपी थाराव पास करपाची मागणी ताचे कडेन केली.
मारयणा फेर्रांव, राजन घाचे, जॉन नाझारेथ आनी पॅप्येचुवा फेर्रांव हाणी सोमाराक मोन्सेरात, उपम्हापौर संजीव नायक हांची भेट घेवंन जाता तितल्या बेगीन थाराव पास करून तो सरकाराक धाडपाची विनवणी केली. म्हादय वाठार वाग राखीव वाठार म्हणून घोशीत केल्यार म्हादयचें उदक घुंवडावपाचे कर्नाटकाचे यत्न फळादीक जावचे नात. हे खातीर राज्यांतल्या थळाव्या स्वराज्य संस्थांनी तशी मागणी करपी थाराव पास करपाची गरज आसा अशें शिश्टमंडळान मोन्सेरात हाका पटोवन दिलें.
शिश्टमंडळान मेरशेचो सरपंच अॅशीस फर्नांडीस, ताळगांवचो सरपंच जोनू रोझारियो, सान्ताक्रुजची सरपंच जेनिफर ऑलिव्हेरा हांकां निवेदना भेटोवन ग्रामसभेंत थाराव पास करपाची विनवणी केली. फाटल्या शेनवारां शिश्टमंडळान तिसवाडी तालुक्यांतल्या पोरणे गोंय, सां मातियश आनी गोलती- नावेली पंचायत सरपंचाक निवेदन सादर केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
