भांगरभूंय | प्रतिनिधी
खबरां संस्था
शारजाः अफगाणिस्तानान दुसरे टी-20 मॅचींत लेगीत पाकिस्तानाक 7 विकेटींनी हारयलें. ही मॅच जिखपा वांगडाच तांणी पाकिस्तानाक क्रिकेटीच्या तिनूय फॉर्मेट एकठांय करून आंतरराष्ट्रीय माळेंत पयलेच फावट हारोवपाची कामगिरी करून दाखयली.
पयली टी-20 मॅच अफगाणिस्तानात 6 विकेटींनी जिखल्ली. राशिद खान अफगाणिस्तानाचें जाल्यार शादाब खान पाकिस्तानाचे फुडारपण करता. बाबर आझम, शाहीन आफ्रिदी आनी मोहम्मद रिझवान हे माळेंत खेळनात. टॉस जिखून पयलीं बॅटिंग करपी पाकिस्तानी पंगडाक अफगाणिस्तानाच्या बॉलरांनी 20 ओव्हरीत 6 आवट 130 धांवड्यांचेर आडावन धऱलें आनी उपरांत 19.5 ओव्हरींत 3 विकेटी वोगडावन जैताचे लक्ष्य हातासलें.
पाकिस्तान आनी अफगाणिस्तान हाचें मदीं आतां मेरेन वट्ट दोन टी-20 मालिका जाल्यात. तातूंतली एक पाकिस्तानान आनी सध्या सुरू आशिल्ली अफगाणिस्तानान जिखल्या.. आतां मेरेन जाल्ल्या पांच मॅचींतल्यो तीन पाकिस्तानान आनी दोन अफगाणिस्तानान जिखल्यात. दोनूय पंगडां मदीं अजून टॅस्ट मॅच जाली ना.
पाकिस्तानाच्या डावाची सुरवात बरी जाली ना. पयलेच ओव्हरींत फजलहक फारूकीन सॅम अयुबाक शून्यार आवट केली आनी फुडल्या बॉलार अब्दुल्ला शफीकाक एलबीडब्ल्यू केलें. ताका तय्यब ताहिरान हॅट्ट्रीक मात करपाक दिली ना. मोहम्मद हरीसान तैयबा वांगडा तिसरे विकेटी खातीर 20 धांवड्यांची भागिदारी केली. नवीन उल हकान हरिसाक गुरबाजाच्या हातांत कॅच दिवपाक लागली. ताणए दोन चौके आनी एक सक्यान 15 धांवड्यो केल्यो. करीम जनातान तयेब (13) आनी रशिद खानान आझम खानाक (1) आवट करून पाकिस्तानाक पांचवो धपको दिलो. हे उपरांत इसाद वसीम आनी कॅप्टन शादाबान सवे विकेटी खातीर 67 धांवड्यांची भागिदारी केली.
वसीमान अर्द शेंकडो करून आंतरराष्ट्रीय क्रिकेटीत शानदार पुनरागमन केलें. इमादान 57 बॉलांत 3 चौके आनी 2 सक्यांनी 32 धांवड्यो केल्यो. फजलहकान दोन, राशिद आनी जनात हांणी दरेकी एक विकेट घेतली
131 धांवड्यांचो फाटलाव करतना अफगाणिस्तानात डावाची सुरवात बरी केली. रहमानउल्ला गुरबाज आनी उस्मान घनी हांणी पयले विकेटीी खातीर 30 धांवड्यांची भागिदारी केली. घनी 7 धांवड्यो करून जमान खानाचे बॉलिंगेचेर आवट जालो. उपरांत गुरबाज आनी इब्राहिम झद्रान दुसरे विकेटी खातीर 56 धांवड्यांची भागिदारी केली. गुरबाजान 49 बॉलांत दोन चौके आनी एक सक्यान 44 धांवड्यो करून रनआवट जालो. इब्राहिम लेगीत 40 बॉलांत तीन चौक्यांचे मजतीन 38 धांवड्यो करून कॅच आवट जालो. निमाणे नजिबुल्ला आनी मोहम्मद नबी हांणी सादूर खेळ करून पंगडाक एक बॉल बाकी आसतना जैत मेळोवन दिलें. अफगाणिस्तानान आयर्लंड, बांगलादेश आनी श्रीलंका उपरांत पाकिस्तानाक लेगीत हारोवपाची कामगिरी करून दाखयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
