भांगरभूंय | प्रतिनिधी
खबरां संस्था
नवी दिल्लीः बायलाचें संवसारीक बॉक्सिंग चॅम्पियनशीप सर्तींत भारतीय बॉक्सरांनी अप्रतीम कामगिरी केली. भारतीय चलयांनी मायभुंयेंत दोळे दिपकावपी कामगिरी करून चार भांगरांची पदकां मेळयली. नीतू घंघासान 45-48 किलो गटांत भांगरा पदक जिखून सुरवात केली. ते उपरांत स्विटी बुरान 75-81 किलो गटांत भांगरा पदक मेळयलें. दुसऱ्या दिसा निखत झरीनान 48-50 किलो गटांत देशाक तिसरें भांगरा पदक जिखून दिलें. सर्त सोपपा पयलीं लव्हलिना बोरगोहेनान 70-75 किलो गटांत भारताक चवथें भांगरा पदक मेळोवन दिलें.
भारतान 17 वर्सां उपरांत बायलांचे संवसारीक बॉक्सिंग सर्तींत चार भांगरा पदकां जिखल्यांत. पंतप्रधान नरेंद्र मोदी हांणी भांगरा पदकां मेळोवपी बॉक्सरांक परबीं भेटयल्यांत.
नीतू घंघासान मंगोलियन लुत्साईखानाक हारोवन भांगरा पदक जिखले. ही झूज सामकी उमळशिकेची जाली. कोण जैतिवंत जातलो हें निमाणे मेरेन सांगप कुस्तार आशिल्लें. स्विटी बूरान चीनाच्या लीना वँगाक हारयले. पयल्या दोन फेरयेंत स्विटी कडेन 3-2 अशी आघाडी आशिल्ली.
निखतान बॉक्सिंग सर्तींत सेगीत दुसरें भांगरा पदक मेळयले. व्हिएतनामाच्या गुयेन थी टॅमाक तिणे चीतपट केलें. सुरवेक सावन तें आघाडेर आशिल्लें. 5-0 अश्या फरकान तिणे हे झूज जिखलें. लव्हलिनान भारताक चवथें भांगरा पदक मेळोवन दितना ऑस्ट्रेलियन बॉक्सर कॅटलीन अॅन पार्कराक हारयलें. दोनूय बॉक्सरां मदीं निकराची लडत जाली. लव्हलिनान पयली फेरी 3-2 अशा फरकान जिखली. दुसरी फेरी कॅटलीनान जिखली. निमणे फेरयेंत अटीतटीची लडत जाली. सगल्या जज्जांनी लव्हलिनाक जैतिवंत घोशीत केलें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
