भांगरभूंय | प्रतिनिधी
भांगरभूंय । प्रतिनिधी
मुरगांवः बायणा- वास्को हांगच्या रवींद्र भवनाचे नवे कार्यकारिणीत राजकारणी आनी वेवसायिकांक घेवपाची हालचाल सुरू जाल्ल्यान कला मळावयल्या मानेस्तांनी नाराजी उक्तायल्या. मेळिल्ले म्हायती प्रमाण रवींद्र भवनाच्या अध्यक्षपदार राज्य भाजप कार्यकारिणीतलो एक वांगडी जाल्यार उपाध्यक्षपदार मुरगांव सडा वाठारांतल्या एका वेवसायिकाक घेवपाचें चल्लां.
ज्यांकां नाट्य, संगीत वा भजन हातूंतलो कसलोच अणभव ना अश्या व्यक्तींत म्हत्वाचीं पदा दिवपाचें कला आनी संस्कृती खात्यान थारायलां अशी म्हायती खात्यांतल्या सूत्रांनी दिल्या. रवींद्र भवन कार्यकारिणीचेर मुरगांव, वास्को आनी दाबोळी वाठारांतल्या कांय जाणांचीं नांवा कला आनी संस्कृती खात्याक धाडल्यांत. विशेश म्हणल्यार वास्को आनी मुरगांवच्या लोकप्रतिनिधींनी हीं नांवां धाडल्यांत अशी खबर आसा.
सध्या रवींद्र भवनाची कार्यकारिणी अस्तित्वांत ना. कलेच्या मळार वावुरपी लोकांक कार्यकारिणीचेर घेवचें अशी ह्या मळार वावुरतात ताची मागणी आसा. मात आपल्या समर्थकांची राजकी सोय लावपा खातीर लोक प्रतिनिधी आपल्याच लोकांक फुडें करतात अशें दिसून आयलां. रवींद्र भवन कले खातीर दोवोरचें थंय राजकी लोकांक थारो दिवचो न्हय अशें कलेच्या मळार वावुरतात तांची मागणी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
