भांगरभूंय | प्रतिनिधी
भंय म्हणटा तो कितें तें ल्हानपणान पळयलें. रात जाली काय हांव भायर वचपाक भियेतालों. भायल्यान वचपाक बाबाक, आजयेक उले मारप. मागीर तीं जशीं दारार उबीं रावलीं काय हांव आपलें काम करून येवप. आमचें घर रानांत आसा. आजू बाजून दाट रान. घरा सकयल भाटां आनी शेतां. पावसा दिसांनी किड्यांचो कलकल. पानांचो टप टप असो आवाज, कोण तरी चलत आयिल्ल्याचो भास. खंय तरी भाटांत पावसाच्या उदकान जड जावन पडपी चुडीत आनी ताचो विचित्र आवाज. हड्यांक धस्स जावप. आतां कोण तरी उबारून व्हरता अशें दिसप.
आमची न्हाणीघर, धुणीघर घरा भायर. संडास तर बरोच पयस. पावसा दिसांनी बेबकां पांयार उडयो मारतालीं आनी हांवें कच्च कन्न आंग काडप. मागीर आसा थंयच्यान पळ काडटालो. नळ्यांचीं शाकारणीं आशिल्लीं घरां, तांकां माडाचे वाशे, कांबी आनी लाकडाचें पाड्डस. ताचे वेल्यान धांवपी हुंदीर, वाश्यांक वेटाळो मारून आळशी जाल्लें माळूण. सामकें रामसे ब्रदरसांचो लायव हॉरर शो कसो.
बाबान खूब उपाय केले, म्हजो भंय घालोवपाचे. केन्ना तांबयो हाडपाक धाडप तर केन्ना दिवो पालोवपाक धाडप. आनी ताका एक रव्याचो लाडू ना जाल्यार दोन पेडे अशें बक्षीस. ते आशेन हांव धांवत वचप आनी वाटेर बेबे, पाली पळोवन परत धांवत येवन बाबाक घट्ट वेंग मारप, बाब म्हाका घेवन परत वचप “खंय कितें आसा पळोवया?” मनांत दिसतालें ‘तें तूं येतलो म्हण थंयच बसून रावला?’
दीस गेले… व्हड जालों… पूण मनांतलो भंय गेलो ना… कांय प्रमाणांत कमी जालो. मागीर एन. एस. एस. कॅम्पांक, राती भोंवडी करून, भंय बरोच देंवलो. भुताखेतांच्यो काणयो, पुस्तकां वाचपाक लागलों, भंय कमी जालो.
कामांक लागलों. मडगांव यो-वच करपाक लागलों. भोंवतेंची शिरवीस, सदां रिपोर्ट आसताले, घरा पावपाक वेळ जावप. वाटेर दोनूय कडांनी अटंगें रान. करमलघाट, चेडवां सावरीं कडेन, घोड्या व्हाळ, अशीं भरगच्च रानां. रातकिड्यांचे घुघमांचे आवाज. बाळ्ळी मठार पावले काय मनीस दिसपाचे. लास्ट बस मडगांव सावन काणकोण साडे सातांक. चुकल्यार टुरिस्ट बशी ना जाल्यार मालाचे ट्रक.
थोड्या तेंपान हांवें सायकल मोटार घेतली. कानाक हेडफोन आनी माथ्यार हॅलमेट घालून सदां वचप. वाटेर काणकोण म्हणल्यार लिफ्ट घेवप. मागीर मागीर चड कळाव जावपाक लागलो, आनी एकटोच वच्चे पडप.
हाका लागून म्हाका एक संवय पडली. चितपाची… वाटभर कवनां चितत वचप… बरें कितें येवजलें तर वाटेर रावन ते मोबायलाचेर उतरवप.. रान म्हण ना गांव म्हण ना… दीस रात… भंय दिसना जालो.
एक दीस राती अडेच जावन गेल्लीं. शिवजयंती आदले दिसाक जावन गेल्ली. हांव आतां करमलघाट चडपाक लागिल्लों. अर्द्यार पावत आयला. बायक चड स्पिडीन ना. म्हाका कवनां सुचतात… आनी पदेता … ‘ते मोडत मोडत येता नागमोड्या वाटेन’…. पदेता पदेता मुखावेल्या चडटेर नदर गेली… आनी तोंडांतलो नाग मोडून, आगे गिला आनी पिछे पिला अशी परिस्थिती… मुखावेल्यान धवें धवें कितें तरी हालताशें दिसलें. पयली दिसलें लायट पडून रुखाचें आंग चकचकता म्हण…. जसजशें हांव लागीं पावपाक लागलों… तशी तशी ती मनशाची आकृती जावपाक लागली…
पोटांक गुळो आयलो… बापायलो एक पूत… पावलो आज गोंयां… राम राम… रामरक्षा, मारुती स्तोत्र, तेत्तीस कोट देव… सगल्यांचो उद्धार जालो… आतां हाता पायांक कडकडो सुटलो… शेळो घाम… बेतबाबा तूं पाव रे सायबा…
लागीं पावलों.. मोरया…
कितें सांगचो कर्मभोग… पाड पडिल्लो गुळ्यां पेट्रोल पंपा कडेन, चार रस्त्यार, चावडेर अशी पासय मारपी… तो गांवचो पिसो ते दीस चलतां चलतां करमलघाटार पावलो. कोणें तरी ताका सदरो दिलां आसत…
शी…!!! बेश्टो भिलों मरे हांव…
मागीर वेग वाडोवन गुळ्यां पावलों.. पंपा सायडीच्या गाड्याचेर एक कडक च्या पिलों. तोंडार उदक मारलें आनी नीट घरा. त्या दिसा सावन कवनां करप रातीं बंद. आनी आयलेंच जाल्यार? दाबून धरप काणकोण पावता म्हणल्यार….
सारंग अग्रासनी
9921868202
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
