भांगरभूंय | प्रतिनिधी
खबरां संस्था
मुंबयः मुंबय इडियन्सान बायलांचे पयले प्रीमियर लीग (डब्ल्यूपीएल) क्रिकेट सर्तींत वस्तादपण मेळयलें. मुंबयच्या ब्रेबॉर्न स्टेडियमाचेर जाल्ले फायनलींत तांणी दिल्ली कॅपिटल्साक 7 विकेटींनी हारयलें. दिल्लीन जैता खातीर दिल्लें 132 धांवड्यांचें आव्हान मुंबयन 19.3 ओव्हरींत हातासलें. नॅटली सिव्हरान जैताचो शॉट मारलो.
फाटल्या तीन सप्तकां सावन सुरू आशिल्ले बायलांचे प्रीमियल लीग सर्तीचो आयतारा समारोप जालो. मुंबय इंडियन्साच्या बायलांनी जैताचे आमी खऱ्यो दावेदार हें सिद्ध केलें. पयल्या डब्ल्यूपीएल कंरडाचेर तांणी आपलें नांव कोरांतीत केलें.
दिल्ली कॅपिटल्सान दिल्ल्या 132 धांवड्यांचो फाटलाव करतना मुंबयची सुरवात बाबत जाली. ओपनर हेली मॅथ्यूज आनी यास्तिका भाटिया फकत 23 धांवड्यांत आवट जालीं. ते उपरांत आयिल्ले नॅटली सिव्हर ब्रंट आनी कॅप्टन हरमनप्रीत कौरान अर्द शेंकड्याची भागिदारी करून पंगडाक जाग्यार हाडलें. हरमनप्रीत 39 बॉलांत 37 धांवड्यो करून आवट जालें. मात सिव्हरान एक बाजू लावून धरून केल्ल्या अर्द शेंकड्याक लागून मुंबयचें जैत सोपें जालें
इंग्लंडाच्या अणभवी नॅटली सिव्हर ब्रंटान मुंबय इंडियन्साक चॅम्पियन केलें. ताणे 55 बॉलांत नाबाद 60 धांवड्यो करून पंगडाक जैत मेळोवन दिलें. दिल्लीच्या 131 धांवड्यांत मुंबन 134 धांवड्यांची जाप दिली. नॅटलीने अमेलिया केर वांगडा चवथे विकेटी खातीर सिव्हरान 20 बॉलांत 39 धांवड्यांची भागिदारी केली. अमेलिया 14 धांवड्याचेर नाबार रावलें. नॅटलीन ताचे पयलीं हरमनप्रीत वागडा तिसरे विकेटी खातीर 74 बॉलांत 72 धांवड्यांची भागिदारी केली. हिली मॅथ्यूजान 13 आनी यास्तिका भाटियान 4 धांवड्यो केल्यो. दिल्ली वतीन राथा यादव आनी जेस जोनासनान देरकी एक विकेट घेतली.
ह्या जैतान मुंबय इंडियन्साक 6 कोटी रुपयाचें पयलें इनाम फावो जालें. दिल्लीक 3 कोटी मेळ्ळे. तिसरे सुवाते वयल्या यूपी वॉरियर्साक एक कोटी
राधा-शिखाची झुंझार खेळी
शिखा पांडे आनी राधा यादवान 10 विकेटी खातीर केल्ले नाबाद 52 धांवड्यांचे विक्रमी भागिदारीक लागून करून दिल्ली कॅपिटल्साक 20 ओव्हरींत 9 आवट 131 धांवड्यो करून मुंबय इंडियन्साक जैता खातीर 132 धांवड्यांचे लक्ष्य दिलें. मुंबयच्या ब्रेबॉर्न स्टेडियमाचेर पयलीं खेळटना दिल्लीचो पंगड 100 धांवड्यो लेगीत करपाक शकचो ना अशें एक वेळार दिसतालें. मात शिखा पांडे आनी राधा यादवान तुफानी अर्द शेंकड्याची भागिदारी करून मुंबय इंडियन्साक बरेंच सतायलें.
शिखा आनी राधान देरकी 27 धांवड्यो केल्यो. 10 वे विकेटी खातीर तांणी निमण्या 24 बॉलांत नाबाद 52 धांवड्यांची भागिदारी केली. भागिदारीचो इतिहास रचून तांणी आपल्या पंगडाक साल्वार करपाचो यत्न केलो. बायलांचे टी-20 क्रिकेटींत आतां मेरेन 10वे विकेटी खातीर इतल्या धांवड्यांची भागिदारी केन्नाच जाली ना.
79 धांवड्यांत 9 विकेटी पडल्या उपरांत शिखा पांडे आनी राधा यादवान52 धांवड्यो करतना राधान 12 बॉलांत नाबाद 27 जाल्यार शिखान 17 बॉलांत नाबाद 27 धांवड्यो केल्यो. राधान आपले खेळींत 2 चौके आनी 2 सके हुबयले जाल्यार शिखान 3 चौके आनी एक सको मारलो. ताच्या पयलीं दिल्लीच्या बॅट्सवुमनांनी निर्शेणी केली. कॅप्टन मेग लँनिंग सोडून हेर कोणूय चड वेळ क्रीजीर रावपाक शकली नात. लॅनिंगान 29 बॉलांत 35 धांवड्यो केल्यो. दुर्दैवान ते रनआवट जालें. मारिजन कॅपान 18 आनी शेफाली वर्मान 11 धांवड्यांचें योगदान दिलें. मुंबय वतीन डून इस्सी बँग आनी हिली मॅथ्यूजान दरेकी तीन विकेटी घेतल्यो. अमेलिया केराल दोन विकेटी मेळ्ळ्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
