भांगरभूंय | प्रतिनिधी
भांगरभूंय । प्रतिनिधी
आगशीः कुठ्ठाळेचो आमदार आंतोन वास हाणे कुठ्ठाळी मतदारसंघांतल्या घाणयाऱ्या उदकाचेर प्रक्रिया करपी प्रकल्पाच्या कामाची सुरवात करून दिली. व्हो प्रकल्प जातगीर घाणयाऱ्या उदकाचो प्रश्न सुटावो जातलो. मतदारसंघांतल्या सगल्या पंचायतींनी अशे तरेच्या प्रकल्पा खातीर सुवात उपलब्द करून दिवपाचो उलो तांणे ह्या वेळार मारलो. ह्या वेळार कुठ्ठाळेचो सरपंच सेनिया परेरा, उपसरपंच दिव्या रायकार, पंचायत सचीव अंकिता घोगोले हाजीर आशिल्ले.
चडशे लोक आपल्या घरांतलें घाणयारें उदक उक्ते सुवातांनी सोडपाक लागल्ल्यान ताचेर प्रक्रिया करपी प्रकल्पांची सामकी गरज आसा. पंचायतींनी ते खातीर सुवात मेळोवन दिवपाक जाय अशें वास हांणे सांगलें. केसरव्हाळ वाठारांत घाणयाऱ्या उदकाची सामकी समस्या उप्रासल्या ते खातीर थंय आमी सगळ्यांत पयली प्रकल्प उबारपाचें काम सुरू केलां. ह्या कामा खातीर सुमार 55 लाख रुपया खर्च येतलो अशी म्हायती वास हाणे दिली.
लोक घाणयारें उदक शेतांनी सोडटात अश्यो कागाळी आसात. लोकांनी अशें करपाक जायना. नितळ भारत मिशना खाला आमी पंचायत वाठारांत प्रकल्प उबारपाक शकतात. मात ते खातीर सुवात मेळपाक जाय. कुठ्ठाळी मतदारसंघातली जमीन फातरट आशिल्ल्यान सॅप्टिक टॅन्क बांदप कुस्तार आसा. ताका लागून घाणयाऱ्या उदकाचेर प्रक्रिया करपी प्रकल्पांची गरज आसा अशें वास हाणे पत्रकारां कडेन उलयतना सांगलें.
नगर नियोजन खात्यान शक्याशक्यतेचो अभ्यास करनास्तना भोव मजली इमारती बांदपाक परवानगी दिल्या. तांका सिव्हरेज प्रकल्पाक जोडणी दिवप शक्य आसा काय ना हाचो विचार खात्यान केलो ना असो आरोप सरपंच सेनिया परेरार केलो.. भलायकी खात्यान एनओसी दितना हे गजालीचो विचार करचो अशें आमी सांगल्लें. फाटल्या पांच वर्सां सावन लोक उक्ते सुवातांनी आपले घाणयारें उदक सोडटात. आमदार वास हांणी हाची पळोवणी करून घाणयारें उदक उक्ते सुवातांनी सोडचें नात हे तांचे कडल्यान लेखी आस्वासन घेतलां अशी म्हायती ताणे दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
