भांगरभूंय | प्रतिनिधी
बायलांची प्रिमियर लिगेचो पयलो हंगाम हळूहळू सोंपपाचे वटेन पावला. लिगेची प्ले ऑफ मॅच निश्चीत जाल्या. हांगाच्या डी व्हाय पाटील स्टेडियमाचेर आयज मुंबय इंडियन्स आनी युपी वॉरियर्स ह्या पंगडां मदीं एलिमिनेटर मॅच जातली. दोन पंगडां खातीर ही मॅच करात वा मरात अशी आसा. जो पंगड जिखतलो तो फायनलींत पावतलो. दिल्ली कॅपिटल्सान फायनलींतली आपली सुवात आदींच निश्चीत केल्या. ताणें बरे नेट रन रेटीच्या आदाराचेर ही मजल मारली.
मुंबय इंडियन्सान लिगेक उत्कृश्ट सुरवात केल्ली. सुरवातीचो ताणें सेगीत पांच मॅची जिखल्यो. तो थेट फायनलींत पावतलो अशें दिशिल्लें. पूण, ताची लय इबाडयली आनी अखेरेक ताका प्ले ऑफांत खेळचें पडलें.
मुंबयच्या बॉलरांनी आनी टॉप ऑर्डर बॅट्समनांनी सुरवातीच्या मॅचींनी जबरदस्त प्रदर्शन केल्लें. ताकाच लागून मुंबयक सुरवातीच्यो सेगीत पांच मॅची जिखपाक येस आयिल्लें. अखेरच्या मॅचींनी ताच्या बॅटरांक बरें प्रदर्शन करपाक जमूंक नाशिल्लें. निमाणे मॅचींत 126 धांवड्यांचो फाटलाव करतना ताच्यो स विकेटी पडिल्ल्यो. ताका लागून आयचे मॅची खातीर पंगड वेवस्थापन टॉप ऑर्डरांत बदल करपाक शकता. यास्तिका भाटियाक सोडली जाल्यार पंगडांतल्या टॉप ऑर्डर खेळगडयांक व्हड मॅची खेळपाचो अणभव आसा. ताका लागून पंगडांत व्हड बदलपाची शक्यताय लेगीत उणी आसा.
दुसरे वटेन युपी वॉरियर्साक आपल्या प्रदर्शनांत सातत्य राखपाक जमूंक ना. अखेरचे मॅचींत लेगीत ताका हार घेवची पडिल्ली.
युपी वॉरियर्सा खातीर भारताच्या खेळगडयांक खास प्रदर्शन करपाक जमूंक ना. अजून मेरेन विदेशी खेळगडयांच्या नेटारूच ताणें मॅची जिखल्यात. मुखेली एलिसा हिली खेरीत तहलिया मॅकग्राथ आनी ग्रेस हॅरीस हांणी धांवड्यो केल्यात. बॉलिंग विभागांत सोफी एक्लेस्टोनान जबरदस्त बॉलींग घाल्या. पंगड वेवस्थापन एलिसा हिलीचो जोडिदार बदलपाक शकता. तशेंच मदले फळयेंत वा बॉलिंगेंत बदल करपाची शक्यताय आसा. देविका वैद्याचे सुवातेर श्वेता सेहरावत डावाची सुरवात करपाक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
