भांगरभूंय | प्रतिनिधी
म्हापशें: शहीद भगत सिंग, सुखदेव आनी राजगुरू ह्या क्रांतिविरांक 23 मार्च 1931 ह्या दिसा ब्रिटिशांनी फांशी दिल्ली. बिरेस्तारा ह्या शहिदांच्या उगडासा खातीर विठ्ठलवाडी, म्हापशेंच्या क्रांतिवीर चौकांत ह्या तिनूय शहिदांक आर्गां ओंपलीं.
नगराध्यक्ष प्रिया मिशाळ, काकुलो कॉलेजीचे प्राचार्य डॉ. संतोष पाटकार, मुखेल उलोवपी सचीन मदगे, आदले नगराध्यक्ष संदीप फळारी, आदले नगरसेवक तुषार टोपले, संजय मिशाळ, लोकमित्र मंडळाचे अध्यक्ष प्रशांत बर्वे, रिजय तिनयकार, अविनाश बेळेकार, एकनाथ म्हापशेंकार, सुरेंद्र शेट्ये, जयेश थळी, दया सामंत हांणी क्रांतिविरांक फुलां ओंपून आर्गां ओंपली.
लोकमित्र मंडळ तशेंच श्रीधर काकुलो म्हाविद्यालय म्हापशें हांच्या जोडपालवान हे कार्यावळीचें आयोजन केल्लें.
प्रिती भोजन सभाघरांत जाल्ले हे कार्यावळींत इतिहासाचे अभ्यासक आनी शिल्पकार सचीन मदगे हांणी शहीद भगत सिंग, सुखदेव आनी राजगुरू हांच्या स्वातंत्र्य लड्यांतल्या योगदाना विशीं म्हायती दिली. त्या तिगांक ब्रिटिशांनी फांशी दिल्ली. तांणीच पुराय भारतांत क्रांतीची मशाल पेटयल्ली. तांचे क्रांतीक लागून ब्रिटिशांक खूब कश्टाचें जाल्लें, अशें तांणी सांगलें. प्रा. डॉ. संतोष पाटकार आनी नगराध्यक्ष प्रिया मिशाळ हांणी ह्या वेळार आपले विचार मांडले. फुडारांत पालिका पांवड्याचेर क्रांतीदीस मनोवचो, अशा आशयाचें निवेदन लोकमित्र मंडळान नगराध्यक्षाक दिलें. सुरेंद्र शेट्ये हांणी सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
