भांगरभूंय | प्रतिनिधी
70 घरांचो रस्त्या खातीर संघर्श; धरणें आंदोलन चालूच दवरपाची शिटकावणी
भांगरभूंय । प्रतिनिधी
केपें: नवीमोड्डी तिळामळ केप्यां सुमार 70 घरांक रस्तोच नाशिल्ल्यान लोकांनी शेल्डें पंचायतीचेर मोर्चो व्हेलो. जे मेरेन मागण्यो पुराय जायना ते मेरेन धरणें आंदोलन चालूच उरतलें, अशी तांणी शिटकावणी दिल्या.
प्रशासन तुमच्या दारांत उपक्रमा खाला मुख्यमंत्री डॉ. प्रमोद सावंत हांणी केपें म्हालाची भोंवडी करून लोकांचे प्रस्न सुटावे करपाचें आस्वासन दितना सांगिल्लें, वीज, उदक, रस्तो हे सारक्यो मुळाव्यो सुविधा दरेका घटकाक मेळप गरजेचें आसा. ते नदरेन सरकार काम करता. मात हाचे उरफाटें चित्र केपें म्हालांतल्या शेल्डें पंचायत वाठारांत पळोवपाक मेळटा.
नवी मोड्डी तिळामळ केप्यां सर्वे नं. 25/13 हातूंत सुमार 70 घरां आसात. सगळे अनुसुचीत जमातीचे लोक आसात. तांकां आपल्या मुळाव्या सुविधां खातीर आयज लेगीत संघर्श करचो पडटा.
ह्या गांवांतल्यान तिळामळ बाजाराक जोडपी रस्तो आदीं एका बिल्डरान इमारत उबारिल्ल्यान बंद जाल्लो. आतां दुसरी इमारत बेकायदो तरेन उबी जाता आनी तिणें आतां दुसरोय रस्तो बंद करपाचे वाटेर आसा. हे खातीर फाटलीं स वर्सां थळावे लोक संघर्श करतात. आतां मेरेन तीन खेपे पंचायतीचेर मोर्चो व्हरून इमारतीचें काम बंद करपाक लायलां. तरी लेगीत राजकी आशिर्वादान सगळे कायदे बोल्सांत घालून परतून परतून इमारत उबी करपाचें काम करतना दिसता.
बिरेस्तारा सकाळीं नवीमोड्डीच्या लोकांनी पंचायतीचेर मोर्चो व्हरून धरणे आंदोलन केलें. जे मेरेन ते इमारतीचें काम बंद करिनात ते मेरेन थंयचे हालचे नात, अशें तांणी स्पश्ट केलें. आमकां इमारती कडेन कांयच देणें घेणें ना, पूण आमकां येवपाक वचपाक रस्तो दिवचो, अशी मागणी लोकांनी केली.
पोरूंय असोच मोर्चो थळाव्या लोकांनी पंचायतीचेर व्हेल्लो आनी पंचायतीक इमारतीचें काम बंद करपाक लायिल्लें. ते उपरांत परतून इमारतीचें काम सुरू जाल्लें. अंदूं परतून थळाव्या लोकांनी पंचायतीचेर मोर्चो व्हरून इमारतीचें काम बंद करपाची मागणी केल्या.
नवीमोड्डीच्या सर्वे नं. 25/13त बेकायदो इमारत बांदकाम चल्ला. ह्या कामाक लागून लोकांची वाट बंद करपाचो यत्न चल्ला. पंचायतीचेर मोर्चो व्हरपाचें कारण म्हणल्यार पंचायत बेकायदो बांदकामांक मंजुरी दिता. आमकां भौशीक रस्तो दिवचो. पंचायतीन कामाक स्थगिती दिल्ली, पूण कांय पंच एकठांय येवन कामाक बांदकामाक मंजुरी दिवची असो थाराव घेतला. अनुसुचीत समाजांतल्या लोकांचेर पंचायत अन्याय करता. पयलीं हें काम बंद करचें, आनी ते उपरांत तो रस्तो भौशीक रस्तो अशें जाहीर करचें, अशी थळाव्या लोकांची मागणी आसा. आमी कोणाच्याच विरोधांत ना. आमकां फक्त रस्तो जाय. आमकां भौशीक रस्तो दितले, अशें पयलीं सांगिल्लें, अशें रॉनी ओलवेरा हांणी सांगलें.
आपूण लोकां वांगडाचः पंच कायतान कार्व्हालो
बेकायदो इमारतीच्या बांदकामाक लागून लोकांची परंपरीक वाट बंद जातली. थळाव्या लोकांचेर हो अन्याय. थळावो पंच म्हूण आपूण लोकां वांगडा रावतलों. ह्या प्रकरणांत मुख्यमंत्री डॉ. प्रमोद सावंत हांणी लक्ष घालचें आनी अनुसुचीत समाजाच्या घटकाक न्याय दिवचो. तिळामळच्या सुमार 70 घरांक रस्त्या खातीर संघर्श करचो पडटा. मुख्यमंत्री ह्या प्रकरणांत न्याय दितले, अशी आस्त आसा, अशें थळावे पंच कायतान कार्व्हालो हांणी सांगलें.
कायदेशीर सल्ल्यान काम बंद करतलेः सरपंच
तिळामळच्या थळाव्या लोकांचें म्हणणें आयकून घेतलां. भौशीक रस्तो उपलब्ध करून दिवचो, अशी तांची मागणी आसा. ते प्रमाण आमी पंचायत सचिवा कडेन चर्चा करतले. तंत्रज्ञांक घेवन वाठाराचें इन्स्पेक्शन करतले. कायदेशीर सल्लो घेवन इमारतीच्या कामाक स्टॉप ऑर्डर काडटले, अशें सरपंच दिप्ती नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
