भांगरभूंय | प्रतिनिधी
ऑस्ट्रेलियेन भारताक तिसरे वन डे मॅचींत 21 धांवड्यांनी हारयलो. हे हारीक लागून भारतान तीन मॅचींची माळ 1-2 अशा फरकान वगडायली. भारत घरच्या मैदानाचेर 26 माळां उपरांत खंयचेय फॉर्मेटांतली द्विपक्षीय माळ हारलो. फेब्रुवारी 2019त ऑस्ट्रेलियेक एक टी-20, पांच वन डे मॅचींचे माळेंत 3-2 फरकान हारयिल्लो. तेन्ना सावन भारत घरच्या मैदानाचेर सात वन डे आनी स टॅस्ट माळो जिखिल्लो. जाल्यार 13 टी-20 माळांतल्यो 11 जिखल्यो जाल्यार दोन बादाबाद दवरिल्ल्यो.
ऑस्ट्रेलियेन दिल्ले 270 धांवड्यांचे मोखीचो फाटलाव करपी भारताक 49.1 ओव्हरींनी सगल्यो विकेटी वगडावन 248 धांवड्यो करप शक्य जाल्यो.
विराट कोहलीन 54, हार्दिक पांड्यान 40, शुभमन गिलान 37, रोहित शर्मान 30 आनी लोकेश राहुलान 32 धांवड्यो केल्यो.
ते आदीं ऑस्ट्रेलियेन टॉस जिखून पयलीं बॅटींग करपाचो निर्णय घेतलो आनी 49 ओव्हरींनी सगल्यो विकेटी वगडावन 269 धांवड्यो केल्यो.ओपनर मिचेल मार्शान 47 धांवड्यांची खेळी केली. जाल्यार एलेकेस केरीन 38 धांवड्यांचें योगदान दिलें. मार्नस लाबशेनान 28, मार्कस स्टोयनीसान 25, ट्रॅव्हिस हेडान 33 आनी डॅव्हिड वॉर्नरान 23 धांवड्यो केल्यो.
भारता वतीन हार्दिक पांड्या आनी कुलदीप यादव हांणी दरेकी तीन विकेटी घेतल्यो. मोहम्मद सिराज आनी अक्षर पटेलाक दरेकी दोन विकेटी फावो जाल्यो.
ऑस्ट्रेलियेच्या लागींलागीं सगल्याच बॅट्समनांक बरे सुरवाती उपरांत व्हड खेळी करपाक अपेस आयलें. स्टिव स्मिथाक सोडलो जाल्यार दरेक बॅट्समनान दोट्टी आंकडो हुपलो. पूण, अर्द शेंकडो मात मारपाक जमलो ना.
भारताच्या बॉलरांनी बरें प्रदर्शन केलें आसलें तरी ऑस्ट्रेलियेन सांघीक खेळी करून स्कोर 250 वयर पावयलो.
ट्रॅव्हिस हेड आनी मिचेल मार्श हांणी ऑस्ट्रेलियेक बरी सुरवात करून दिली. आक्रमक बॅटींग करून भारताचेर चेपण हाडलें. पूण, हार्दिक पांड्यान एका फाटल्यान तीन विकेटी घेवन ऑस्ट्रेलियेच्या वेगाक ब्रेक लायलो. पांड्यान हेड, मुखेली स्मिथ आनी मार्श हांकां तंबूंत धाडले.
ऑस्ट्रेलिये वतीन कोणाकूच व्हड भागिदारी करपाक जमली ना. पूण, सांघीक खेळ करीत पंगडाचो डाव मुखार व्हेलो.
सुर्याची बॅटींग हॅट्रीक
सुर्यकुमार यादव सेगीत तिसरे मॅचींत शुन्याचेर बाद जालो. पयले आनी दुसरे मॅचींत तो मिचेल स्टार्काच्या बॉलाचेर एलबीडब्ल्यू बाद जाल्लो, जाल्यार काल अॅश्टोन अॅगरान बोल्ड केलो. सुर्या बॅटींग हॅट्रीक करपी संवसारांतलो 13वो बॅट्समन थारलो. बॅट्समन सेगीत तीन डावांनी पयल्या बॉलाचेर शुन्याचेर बाद जाता ताका बॅटींग हॅट्रीक म्हणटात.
सुर्या पयलीं सचिन तेंडुलकर, अनील कुंबळे, जहीर खान, ईशान शर्मा आनी जसप्रीत बुमरा सेगीत तीन वन डे मॅचींनी शुन्याचेर बाद जाल्यात, पूण, हे सगले सेगीत पयल्या बॉलाचेर बाद जावंक नाशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
