भांगरभूंय | प्रतिनिधी
वर्सुकी येणावळ पांच लाखां परस चड आशिल्ल्या सरकारी कर्मचाऱ्यांचीं रेशनकार्डां रद्द करपाचो निर्णय नागरी पुरवण खात्यान घेतला. खूब बरी गजाल, पूण हातूंत नाविन्य कितें आसा? सरकाराच्या येवजण्यांचो लाव चडशे सरकारी कर्मचारीच घेतात, हें आतां लिपून उरूंक ना. चलयां खातीर लाडली लक्ष्मी, बायलां खातीर गृह आदार, जाण्ट्यां खातीर पेन्शन तशेंच दीनदयाळ निराधार ह्या सारक्यो कितल्योश्योच येवजण्यो सरकारान आंखल्यात, त्यो चालिकूय लायल्यांत. हातूंतल्यो कितल्यो गरजेवंतां मेरेन पावतात? सरकारी येवजण्यांचो लाव गरजेवंतां पसत सरकारी कर्मचारीच घेतात हें सरकाराक खबर ना? सरकारा कडेन ताची नोंद ना? गरजेवंतां खातीर तयार केल्ल्यो येवजण्यो तांचे मेरेन पावच्यो हे खातीर सरकार कित्याक यत्न करिना? त्यो- त्यो येवजण्यो त्या त्या व्यक्तीं मेरेन पावल्यो काय नात हाची खात्री करून घेयात असो आदेश सरकार संबंदीत अधिकाऱ्यांक कित्याक दिवंक शकना? सरकारी येवजण्यांचो लाव सरकारी कर्मचारीच घेतात हें सरकाराक खबर ना? सरकारी कर्मचारी पगार कितलो घेतात आनी तांची वर्सुकी येणावळ कितली जाता हाची म्हायती सरकारा कडेन ना? आसा? जाल्यार हें कोणाच्या दोळ्यांक उदक लावंक चल्लां? रेशन कार्डां रद्द करून रेशनकार्डाचें अस्तित्वूच ना करपा खातीर चलिल्ली ही धडपड बी न्हय मूं? तशें जाल्यार भौशीक वितरण वेवस्था आसून नासून सारकीच अशें म्हणचें पडलें ना?
आतां मजा पळयात : वर्सुकी येणावळ पांच लाखां परस चड आशिल्ल्यांचीं रेशनकार्डां खंय रद्द जातलीं. पांच लाख रुपयांची येणावळ मेजतले कशे? म्हयन्याक पगार जोडप्याचें एकवेळ समजूं येता. कारण ताची येणावळ नोंद जाल्ली आसता. दीसवड्याचेर जो काम करता ताची येणावळ कशी मेजतले? असंघटीत क्षेत्रांत काम करप्यांची येणावळ कशी कळटली? तांची येणावळ खंयच नोंद जाल्ली आसना.
हे आदीं म्हणल्यार फाटल्या म्हयन्यांत ह्या खात्यान ज्या रेशनकार्ड धारकांनी स म्हयने रेशन व्हरूंक ना तांचीं रेशन कार्डां निलंबीत करपाचो निर्णय घेतिल्लो आनी आतां मेरेन गोंयांतलीं 82 हजारां परस चड रेशनकार्डा खंय निलंबीत केल्यांत.
मुदलांत प्रस्न असो येता : लोक नेमान रेशन कित्याक व्हरिनात? आपलो म्हयन्याचो कोटो सुगूर करून कित्याक घेनात? रेशना वयलो म्हाल उणाक दर्ज्याचो आसता म्हणुनूच मूं? तशें जाल्यार रेशनाचो म्हाल (देखीक तांदूळ, गंव) बरे प्रतीचो आसचो अशी तजवीज सरकार कित्याक करूंक शकना? सोसायटीचे तांदूळ, गंव मनशांनी खावपाचे लायकीचे नात, आमी गंव दुकरांक घालतात अशें सोसायटींत रेशन हाडूंक गेल्ल्या वेळार सर्रास कानार पडटा. हाचे वयल्यान सोसायटीचो म्हाल कितलो निकृश्ठ प्रतीचो आसता हाचो अदमास काडूं येता.
उक्त्या बाजारांतल्या तांदळाचे दर सर्वसामान्य मनशाक परवडनात म्हणून सरकार भौशीक वितरण माध्यमांतल्यान लोकांक सवाय दरान तांदूळ दिता. उक्त्या बाजारा परस सोसायटींनी मेळपी तांदळाचे दर मातशे सवाय आसतात. पूण ताचो दर्जो मात सामको उणाक आसता आनी म्हणुनूच रेशनकार्ड आसुनूय चडशे लोक उक्त्या बाजारांतलो तांदूळ (तो मागीर कितलोय म्हारग जावं) खावप पसंत करता. म्हणटकूच भौशीक वितरण माध्यमांतल्यान हीं सवाय धान्य दुकानां सुरू करपा फाटलो हेतू साध्य जालो अशें कशें म्हणूं येत? मातसो गिरेस्त आशिल्ल्यांचीं रेशन कार्डां रद्द केलीं जाल्यार रेशनकार्ड धारकांची संख्या उणी जातली आनी ल्हवू ल्हवू करून सवाय धान्य दुकानां बंद करपाची पाळी सरकाराचेर येतली हें सांगपाक खंयच्याच ज्योतिशाची गरज ना.
तांदूळ, गंव सोडल्यार साकर आनी तेलाक रेशन कार्ड लागना. कोणाच्यानूय सोसायटींत वचून रेशन कार्ड दाखयनासतना पामतेलाच्यो जाय तितल्यो पोतयो आनी जाय तितली साकर व्हरूं येता. ह्यो तेलापोतयो आनी साकर बाजाराच्या दरांत कोणाच्यानूय विकूं नजं? कांय भुसारी दुकानदार तशें करिनात वा करचे नात कित्या वयल्यान? गोंयांत कितलींशींच सवाय धान्य दुकानां आसात, तातूंतलीं म्हयनोभर कितलीं उक्तीं आसतात? कित्याक उक्तीं आसनात? तांदूळ आनी गंवा भशेन साकर आनी तेल रेशनाचेर कित्याक मेळना?
रेशनाचेर कड्डण मेळटलें अशें नागरी पुरवण मंत्र्यांनी फाटीं जाहीर केल्लें. ताचें कितें जालें? कितलीं सवाय धान्य दुकानां वेळ पाळटात? चडश्या सवाय धान्य दुकानांनी म्हयन्याचे 20 तारखे मेरेनूच धान्य कित्याक मेळटा? उपरांत कित्याक मेळना? जीं सवाय धान्य दुकानां आपलो कोटो व्हरतात, तातूंतलो सगलो म्हाल खपता? उरिल्लो म्हाल खंय वता? कांय सवाय धान्य दुकानांतल्या धान्यांक पांय फुटून तें लागसारच्या पसऱ्यार वता, हें संबंदीत अधिकाऱ्यांक खबर ना? ते ओगी कित्याक? असल्या लोकांचेर कारवाय कित्याक जायना? काय ‘तेरी भी चूप, मेरी भी चूप’ अशें म्हणून हे संबंदीत अधिकारी कानार केंस काडून दोळे आसून कुड्डे आशिल्ल्याचें नाटक करतात काय?
जांचीं वर्सुकी येणावळ पांच लाखां वयर आसा अशा लोकांचीं रेशन कार्डां आतां रद्द जातलीं. धान्याचो काळोबाजार आडावपा खातीर खात्यान हो निर्णय घेतला अशें खातें सांगता. हें खीणभरा खातीर जरी खरें मानलें तरी धान्याचो काळोबाजार जावचो ना कित्या वयल्यान? साकर तेंवची ना कित्या वयल्यान? तूरदाळ भातेवची ना कित्या वयल्यान? पामतेल भायले भायर पसऱ्यांनी वच्चें ना कित्या वयल्यान? धान्याचो काळोबाजार आडावपा खातीर वर्सुकी पांच लाखां परस चड येणावळ आशिल्ल्यांचीं रेशनकार्डांच रद्द करप हो हाचेर उपाय जावंकूच शकना.
खरें म्हणल्यार लोक सोसायटींतलें धान्य कित्याक व्हरिनात ताचो अभ्यास सरकारान करूंक जाय. तांदळाची आनी गंवाची पत वाडोवपाचो यत्न जावंक जाय. वर्साचीं वर्सां तेच तांदूळ, कोचोप आशिल्ले तेच गंव कितलीं वर्सां खावपाचे?
आदीं सगले लोक सोसायटीचेरूच पातयेवन आसताले. तांदूळ आनी गंव कसलेय जावं, ते व्हरताले पूण आयज तो तेंप ना. लोकां कडेन पयसो घोळूंक लागला. तांच्यो रुची बदल्ल्यात. तांकां बरें बरें खायन दिसता. ताका लागून ते कितलोय पयसो वगडावंक तयार आसतात. लोकांची ही बदलिल्ली मानसीकता सरकारान समजून घेवंक जाय आनी तांदूळ, गंवूच न्हय जाल्यार कड्डणां सारक्यो मनशाक दीसपट्टे जिणेक लागपी गरजेच्यो वस्तू बरे प्रती सयत (निदान खावपाचे लायकीच्यो तरी) रेशनाचेर सवाय दरान दिवपाची तजवीज जावंक जाय. तशें केल्यारूच सवाय धान्य दुकानां कडेन फाट केल्ल्या लोकांचीं पावलां परत त्या दुकानां कडेन वळटलीं आनी अशीं दुकानां तिगून उरतलीं. नाजाल्यार आनीक कांय वर्सांनी अशीं दुकानां ल्हवू ल्हवू करून बंद जातलीं (कांय कडेन अशीं दुकानां बंदूय जाल्यांत) आनी फुडले पिळगेक अश्या दुकानांचीं चित्रां काडून आमकां दाखोवचीं पडटलीं.
सरकारान भौशीक वितरण वेवस्था मजबूत करपा खातीर पावलां उखलूंक जाय. हे वेवस्थेंतल्यान बरे प्रतीचो म्हाल लोकां मेरेन पावतलो हाची वेवस्था करूंक जाय. ओगीच उखल्ली जीब लायली ताळ्याक अशें जावंक उपकारना.
अतुल र. पंडित
9623269013
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
